Эми Актон миллиардер Рамасвами билан кечган кескин курашдан сўнг Оҳайо губернаторлиги сайловида ғалаба қозониши кутилмоқда
Республикачи номзод Актоннинг онаси тасвирланган рекламани эълон қилганидан кейин пойганинг сўнгги ҳафталарида кураш янада қизиб кетди.
CBS News тахминларига кўра, Эми Актон миллиардер Вивек Рамасвами билан кечган кескин курашдан сўнг Оҳайо штати губернаторлигини қўлга киритиши кутилмоқда.
Ушбу ғалаба билан Актон сўнгги икки ўн йилликда Оҳайо штати губернатори сайловида ғолиб чиққан биринчи демократ ва биринчи аёлга айланди.
2000-йилларнинг катта қисмида асосий кураш майдонларидан бири бўлган Оҳайо штати сўнгги учта президентлик сайловида, жумладан, 2024 йилда 11 фоизлик фарқ билан республикачи Дональд Трампни қўллаб-қувватлаган эди.
Шундай бўлса-да, сайловчиларнинг иқтисодиёт ва яшаш нархидан норозилиги асосий мавзуга айланган губернаторлик сайлови Рамасвами кампанияси Актоннинг узоқлашган онаси иштирокидаги ўта шахсий ҳужумкор рекламани эфирга узатганидан кейин кескин бурилиш ясади.
Рекламада Актоннинг онаси Донна Артур қизи "бутун умри давомида ёлғон гапирганини" айтди. Рекламада Артурнинг эри Актонга болалигида тажовуз қилганликда айблангани қайд этилмаган эди.
Ушбу баҳсли ролик кампаниянинг сўнгги ҳафталарида катта муҳокамаларга сабаб бўлди. Жанубий Каролинанинг собиқ губернатори, республикачи Никки Хейли уни танқид қилди, Оҳайо штатининг амалдаги республикачи губернатори Майк ДеВайн эса уни "жуда хавотирли" деб атади.
Бироқ, баъзилар, жумладан, Президент Трамп ва Вице-президент Вэнс уни ҳимоя қилишди.
Трамп уни "таъсирли" деб атади ва Рамасвамига уни эфирда қолдиришни тавсия этди, штатнинг собиқ сенатори Вэнс эса партиядош республикачиларни реклама ҳақида "нолишни" тўхтатишга чақирди ва ўз партияси аъзоларининг танқидларидан "бир оз жирканганини" айтди.
Рамасвами унинг кампанияси ушбу рекламани штат бўйлаб намойиш қилиш учун 4 миллион доллар (3 миллион фунт стерлинг) сарфлашини айтди.
Реклама эфирга узатила бошлагач, Оҳайонинг маҳаллий Columbus Dispatch нашри таҳририят ҳайъати рекламани "жирканч ва ташвишли" деб атаб, Актон номзодини қўллаб-қувватлади.
Миллиардер биотехнология тадбиркори 2024 йилда Республикачилар партиясидан номзодлик учун Трампга қарши курашган эди. Кейин у эътиборини Оҳайо губернаторлиги сайловига қаратди ва ўзини Трамп каби президентнинг "Биринчи навбатда Америка" кун тартибини илгари суришни хоҳлайдиган сиёсий бегона (аутсайдер) сифатида танитди.
Мағлубиятни тан олиш нутқида Рамасвами Актонга ҳамда штатга "муваффақият тилашини" айтди.
Шифокор ва жамоат соғлиқни сақлаш мутахассиси бўлган Актон кампания давомида ҳаёт кечириш арзонлигини таъминлаш зарурлигини таъкидлаш билан бирга, болалигида уйсиз қолган тажрибаси ҳақида гапириб берди.
Сешанба куни сўзлаган ғалаба нутқида у "соғайиш бугун бошланади" деди.
"Менинг Оҳайога, менга овоз берганларга ва бермаганларга берган ваъдам шуки, мен Оҳайоликлар ҳаётини яхшилаш учун ҳар доим қилганимдек, ҳамма билан бирга ишлайман", деди у.
Актон ваколат муддати тугаётган республикачи губернатор Майк ДеВайннинг ўрнини эгаллайди.
Оҳайо — 2024 йилги сайловда Трампга овоз берган беқарор штат, аммо ҳозирда республикачи номзодлар бутун мамлакат бўйлаб кескин рақобатга дуч келмоқда.