Дунёдаги энг йирик нефт импортчилари маълум бўлди
2025-йил якунларига кўра, Хитой кунига 13,8 миллион баррел нефт ва нефт маҳсулотлари импорт қилиб, дунёда биринчи ўринни эгаллади. Кейинги ўринларда АҚШ ва Ҳиндистон қайд этилган. Жаҳон нефт импортининг ярмидан кўпи Осиё–Тинч океани минтақаси ҳиссасига тўғри келган.
Дунёдаги энг йирик нефт импортчилари аниқланди
Накед Ссиенсе нашри Висуал Сапиталист инфографикасига таянган ҳолда хабар беришича, рейтинг ОПЕКнинг 2026-йилги йиллик статистик бюллетени маълумотлари асосида тузилган. Ҳисоб-китобларга хом нефт, жумладан газ конденсати ҳамда нефт маҳсулотлари ҳам киритилган.
Рейтингда экспорт чегириб ташланмаган ялпи импорт ҳажми кўрсатилган. Шу сабабли импорт қилинган нефтнинг бир қисмини қайта ишлаб, яна хорижга сотадиган Сингапур ва Нидерландия каби давлатлар ҳам юқори поғоналардан жой олган.
Хитойнинг 2025-йилдаги нефт ва нефт маҳсулотлари импорти кунига 13,8 миллион баррелни ташкил этган. Бу иккинчи ўриндаги АҚШ кўрсаткичидан қарийб икки баравар кўп. Хитойнинг фақат хом нефт импорти эса кунига рекорд даражадаги 11,6 миллион баррелга етган.
АҚШ йирик импортчи бўлиши билан бирга, катта ҳажмда нефт ва нефт маҳсулотлари экспорт ҳам қилади. 2025-йилда мамлакатнинг ушбу экспорти кунига 10,7 миллион баррелни ташкил этган.
Америка нефтни қайта ишлаш заводларининг аксарияти дастлаб оғир нефтни қайта ишлашга мослаб қурилган. Шу боис АҚШ хориждан нефт сотиб олишда давом этмоқда. Америка импортининг қарийб 57 фоизи Канада ҳиссасига тўғри келади. Айни пайтда енгилроқ сланец нефти ва ортиқча ёнилғи ҳажмлари экспортга йўналтирилади.
Рейтингда учинчи ўринни кунига 6,2 миллион баррел импорт билан Ҳиндистон эгаллаган. Ундан кейин Жанубий Корея — 3,8 миллион баррел ва Япония — 3,3 миллион баррел билан қайд этилган.
Хитой, АҚШ, Ҳиндистон, Жанубий Корея ва Япония биргаликда жаҳон нефт импортининг 46 фоизини ташкил этган.
Биринчи бешликдан ташқарида Сингапур ва Нидерландиянинг кўрсаткичлари ҳам юқори. Улар мос равишда кунига 2,8 миллион ва 2,7 миллион баррел импорт қилган. Ҳар икки мамлакат йирик нефтни қайта ишлаш ва савдо маркази бўлиб, олиб кирилган нефтнинг салмоқли қисмини қайта ишлаб, реекспорт қилади.
2025-йилда Осиё–Тинч океани минтақаси мамлакатлари кунига 38,2 миллион баррел нефт ва нефт маҳсулотлари импорт қилган. Бу жаҳон кўрсаткичининг 50,1 фоизига тенг.