Дронлар парвози тақиқланганидан кейин Эфиопия пойтахтида портлашлар эшитилди
Бу воқеа пойтахт шимолида армия ва қуролли гуруҳларнинг янги иттифоқи ўртасида тўқнашувлар бошланганидан бир ҳафта ўтиб юз берди.
**Дронлар парвози тақиқланганидан кейин Эфиопия пойтахтида портлаш товушлари эшитилди**
Ўтган ҳафтада тўқнашувлар бошланганидан бери пойтахтда хавфсизлик борасида хавотирлар мавжуд.
Аҳоли ва дипломатик манбаларга кўра, Эфиопия пойтахтида тунда портлаш товушлари эшитилган, улардан баъзилари шаҳар ғарбидаги ҳарбий штаб-квартира яқинида, яна бири эса жанубида содир бўлгани хабар қилинган.
Портлашлар Аддис-Абеба узра дронлар парвози тақиқланганидан бир неча соат ўтиб ва шимолда армия ҳамда таркибига Тиграй вилояти кучлари ҳам кирган қуролли гуруҳларнинг янги тузилган альянси ўртасида тўқнашувлар бошланганидан бир ҳафта ўтиб юз берди.
Мухолифатчи жангчилар билан алоқадор манба Reuters ахборот агентлигига улар дрон ҳужумлари деб таърифлаган ушбу ҳаракатлар учун масъул эканликларини айтди.
«Бу жуда баланд овоз эди. У машиналарнинг сигнализациясини ишга тушириб юборадиган даражада кучли эди», — деди шаҳарнинг жанубий қисмида, махсус хизмат базаси яқинида яшовчи аҳоли вакили BBC Amharic хизматига.
Унинг айтишича, у портлаш овозини маҳаллий вақт билан тахминан соат 00:30 да (Гринвич бўйича 21:30) Готера маҳалласида эшитган.
Яна бир маҳаллий турғун BBC’га у ва дўстлари ўйин ўйнаётганларида портлаш овозини эшитишганини айтди.
У ғарбий чекка ҳудуд — ҳарбий штаб-квартира яқинидаги Торҳайлоч маҳалласида яшайди.
Портлашларга нима сабаб бўлгани, жабрланган аниқ ҳудудлар ёки қурбонлар ва талофатлар бор-йўқлигини тасдиқловчи расмий хабарлар берилмади.
Эфиопия Бош вазири Абий Аҳмед идораси, Мудофаа вазирлиги, шунингдек, федерал ва Аддис-Абеба полицияси BBC’нинг изоҳ бериш ҳақидаги сўровларига жавоб бермади.