Дональд Трамп икки кунлик ташрифи чоғида Ирландия президенти билан учрашади

Дональд Трамп келаси ҳафта Ирландия Республикасига икки кунлик ташрифи чоғида Ирландия президенти Кэтрин Коннолли билан учрашиши кутилмоқда.

АҚШ президенти шанба куни, 12 сентябр куни «Air Force One» (Биринчи рақамли борт) самолётида Дублинга етиб келиши кутилмоқда.

У Коннолли билан учрашади, сўнгра Клэр графлигидаги Дунбег шаҳрида жойлашган гольф майдонига йўл олишдан олдин Таосич (Ирландия бош вазири) Михол Мартин билан икки томонлама учрашув ўтказади.

Коннолли бундан аввал АҚШни Ғазо бўйича позицияси учун танқид қилган эди, бироқ АҚШ президенти Ирландияга келса, уни «кутиб олиши ва саломлашишини» айтган.

Ўтган йили ўзининг президентлик кампанияси пайтида у Трампни «зўравон» деб таърифлаган эди.

«Америка билан боғлиқ ишонч муаммом борми? Менимча, мамлакатдаги ҳар бир кишининг Америка билан боғлиқ ишонч муаммоси бор», — деган эди у.

«Бизда беқарор, олдиндан айтиб бўлмайдиган, ўзини зўравондек тутадиган, ўзига маъқул келганда божлар жорий этадиган президент (Дональд) Трамп бор.

Биз божларнинг оқибатлари ҳақида гапиришда давом этяпмиз, лекин геноцид оқибатлари ҳақида гапирмаяпмиз».

Трамп ўтган йилнинг март ойида Муқаддас Патрик куни байрами муносабати билан Овал кабинетда Мартин билан ўтказилган икки томонлама учрашувда Ирландия президентига нисбатан «у» (эркак жинсида) деб мурожаат қилган эди.

Конноллининг Яқин Шарқдаги халқаро ҳуқуқ бузилишларини танқид қилган фикрлари ҳақида нима деб ўйлаши сўралганда, Трамп шундай деган эди: «Қаранг, у менинг борлигимдан бахтиёр, айта оладиган гапим шу холос».

BBC News NI нашрининг тушунишича, АҚШнинг Ирландия пойтахтидаги янги элчихонаси учун аввалроқ режалаштирилган пойдевор қўйиш маросими эндиликда ўтказилиши даргумон.

Шу билан бирга, Трамп «Irish Open» гольф турниридаги ўйинларни томоша қилиши кутилмоқда ва баъзи манбаларнинг фикрига кўра, у якшанба куни кечқурун ғолибга кубокни топширади.

Йирик хавфсизлик операцияси Ирландия хавфсизлик кучлари томонидан қатъий назорат қилинади.

Ирландияга ташриф буюрган охирги АҚШ президенти 2023 йил апрелида Жо Байден бўлган эди.