Деярли Столыпинчасига
Қозоғистонликларга мегаполислардан ихтиёрий кўчиб ўтганлари учун пул тўланади
Деярли Столыпинчасига
Қозоғистонда фуқароларга йирик шаҳарлар ва аҳоли зич жойлашган ҳудудлардан ишчи күчи танқис бўлган вилоятларга ихтиёрий кўчиб ўтгани учун тўланадиган субсидиялар тасдиқланди. Тўловларни ажратиш қоидалари ҚР Меҳнат ва аҳолини ижтимоий ҳимоя қилиш вазирлиги томонидан тасдиқланди, тегишли буйруқ ҳуқуқий ахборот онлайн-банкида эълон қилинди.
Аҳоли кўчиб чиқиб кетадиган ҳудудлар қаторига Олмаота, Остона ва Чимкент шаҳарлари, шунингдек, Жамбил, Туркистон ва Манғистов вилоятлари киритилди. Охирги 10 йил ичида аҳолининг 2 фоиздан ортиқ ўсиши ёки аҳоли зичлигининг бир квадрат километрга 6,4 кишидан ортиқ бўлиши мезон бўлиб хизмат қилди.
Қўллаб-қувватлашни, масалан, ҳукумат ходимларга эҳтиёж борлигини қайд этаётган Шарқий Қозоғистон, Шимолий Қозоғистон, Қўстанай, Павлодар, Абай, Қарағанда ёки Улитау вилоятларига кўчиб ўтишда олиш мумкин.
Дастурда кўчиб ўтиш ва коммунал хизматлар харажатларини қоплаш, хизмат уй-жойи ажратиш ёки уни ижарага олиш харажатларини қоплаш, касбий ўқитиш ва тадбиркорлик фаолиятини ташкил этишда ёрдам бериш кўзда тутилган. шунингдек, кўчиб ўтганлар уй-жой сертификатига даъво қилишлари мумкин бўлади. Субсидиялар дастур иштирокчиларини ишга қабул қиладиган иш берувчилар учун ҳам кўзда тутилган.
Тўловлар миқдори ойлик ҳисоб-китоб кўрсаткичларида (ОҲК) ҳисобланади. Ҳисоб-китобларга кўра, 2027 йилда тўрт-беш кишидан иборат оила барча шартларга риоя қилган тақдирда жами $20 мингга яқин маблағ олиши мумкин.
Шу билан бирга, дастурда чекловлар ҳам кўзда тутилган. Хусусан, ўз туғилиб ўсган ҳудудига қайтаётган ва у ерда аллақачон уй-жойи бўлган фуқаролар, шунингдек, янги яшаш жойи бўйича рўйхатдан ўтмаганлар тўловларни ола олмайдилар.
Агар дастур иштирокчиси аслида янги ҳудудда яшамаётгани, у ерда беш йил давомида яшаш ва ишлаш шартини бажармаётгани, яқин қариндошидан ёки мўлжалланган аҳоли пунктидан ташқарида уй-жой сотиб олгани ёки сохта ҳужжатлар ёки ёлғон маълумотлар тақдим этгани аниқланса, олинган маблағларни қайтаришга тўғри келади.
Буйруқ 2027 йил 1 январдан кучга киради. Молиялаштиришга бўлган эҳтиёжни шакллантириш ва тўловларни «Фуқаролар учун ҳукумат» давлат корпорацияси орқали ўтказишни тартибга солувчи алоҳида қоидалар 2027 йил 1 июлдан кучга киради.
Янги буйруқ 2023 йил июнь ойида тасдиқланган ихтиёрий кўчиб ўтиш қоидаларини ва унга киритилган кейинги ўзгартиришларни алмаштиради. Қозоғистонда бир неча йилдан бери турли кўчиш дастурлари амал қилмоқда, аммо шу пайтгача улар муваффақиятли деб ҳисобланмаган.
Меҳнат вазирлигининг ўтган ёздаги маълумотларига кўра, 2017 йилдан бери 73,9 минг киши ихтиёрий кўчиб ўтиш дастури иштирокчисига айланди, улардан 31 минг кишини доимий ишга жойлаштиришга муваффақ бўлинди.