Бухоронинг ҳунармандчилик мероси Ўзбекистонни ЮНЕСКОнинг 2027 йилдаги конференцияси диққат марказига олиб чиқмоқда
Ўзбекистоннинг Бухоро шаҳри 2027 йилда ЮНЕСКО Ижодкор шаҳарлар тармоғининг 19-конференциясига мезбонлик қилади. Бухоро биенналесининг қайтиши билан бир қаторда ўтказиладиган ушбу тадбир Ижодкор шаҳарлар вакиллари, маданият ходимлари ва халқаро экспертларни бир жойга жамлайди ҳамда қадимий Ипак йўли шаҳрига ўзининг анъанавий ҳунармандчилиги ва замонавий санъатини намойиш этиш имконини беради.
Бухоронинг ҳунармандчилик мероси Ўзбекистонни 2027 йилги ЮНЕСКО конференцияси диққат марказига олиб чиқмоқда
Бухоро 2027 йилда ЮНЕСКОнинг Ижодкор шаҳарлар тармоғи йиллик конференциясига мезбонлик қилиши белгиланган бўлиб, бу қадимий Ипак йўли шаҳрини ҳунармандчилик, маданий алмашинув ва ижодий саноатларга бағишланган халқаро кун тартибининг марказига айлантиради.
Конференциянинг 19-йиғилиши ЮНЕСКОнинг Ижодкор шаҳарлари вакилларини, жумладан, шаҳар ҳокимликлари мутасаддилари, санъаткорлар, маданият ходимлари ва халқаро экспертларни бир жойга жамлайди.
Конференцияга мезбонлик қилиш ташаббуси Президент Шавкат Мирзиёев томонидан 2025 йил 30 октябрь куни Самарқандда ЮНЕСКО Бош конференциясининг 43-ссияси очилишида илгари сурилган эди. Ўзбекистон сўнгги 40 йил ичида илк бор ЮНЕСКОнинг Париждаги қароргоҳидан ташқарида ўтказилган ушбу сессияга мезбонлик қилди.
Бухоронинг танланиши унинг анъанавий ҳунармандчилик маркази сифатидаги мақомини акс эттиради. Шаҳар 1993 йилда ЮНЕСКОнинг Умумжаҳон мероси рўйхатига киритилган, 2023 йилда эса «Ҳунармандчилик ва халақ санъати» категорияси бўйича Ижодкор шаҳарлар тармоғи аъзосига айланган. Унинг узоқ тарихга эга ҳунармандчилик анъаналарига зардўзлик, сополчилик, заргарлик ва ёғоч ўймакорлиги киради.
Ушбу халқаро тадбир 2027 йилнинг 3 сентябридан 21 ноябригача иккинчи бор ўтказилиши режалаштирилган Бухоро биенналеси билан бир вақтда бўлиб ўтади. Тадбирга бадиий жиҳатдан Кулапат Янтрасаст раҳбарлик қилади.
2025 йилда ўтказилган илк биеннале 10 ҳафта давомида 1,5 миллиондан ортиқ ташриф буюрувчини жалб этди ва 70 дан ортиқ замонавий санъат лойиҳаларини ўз ичига олди. Унинг дастури халқаро санъаткорлар ва кураторларни маҳаллий ҳунармандлар билан бирлаштириб, анъанавий усулларни замонавий бадиий амалиётлар билан боғлади.
Ташкилотчиларнинг таъкидлашича, бу икки тадбир маданият муассасалари, ижодкор мутахассислар ва шаҳар маъмуриятлари ўртасидаги ҳамкорлик учун кенгроқ майдон яратиши, шунингдек, халқаро шериклик ва тажриба алмашиш учун имкониятлар очиши кутилмоқда.
2017 йилда ташкил этилган Ўзбекистон Маданият ва санъатни ривожлантириш жамғармаси (ACDF) мамлакат маданий меросини оммалаштириш ва замонавий санъат соҳасини қўллаб-қувватлаш йўлида фаолият юритади. Жамғарма 40 дан ортиқ халқаро муассасалар, жумладан, Лувр, Уффици галереяси, Британ музейи ва Пекиндаги Гугун сарой музейи билан ҳамкорлик ўрнатган. Унинг лойиҳалари 17 мамлакат бўйлаб 5 миллиондан ортиқ ташриф буюрувчини қамраб олди.
2004 йилда ташкил этилган ЮНЕСКОнинг Ижодкор шаҳарлар тармоғи шаҳарларни ижодкорлик ва маданий саноатни ўзларининг барқарор ривожланиш стратегияларига интеграция қилишга ундайди. Унинг йиллик конференцияси аъзо шаҳарлар ўртасида навбат билан ўтказилади ҳамда маданий сиёсат, шаҳарсозлик ва халқаро ҳамкорлик бўйича форум вазифасини ўтайди.
2026 йилги конференция Марокашнинг Эс-Сувейра шаҳрида 25-27 ноябрь кунлари ўтказилиши белгиланган. Учрашув «Шаҳарларнинг интеграциялашган барқарор ривожланиши учун маданий инновациялар» мавзусига бағишланади.