Бухоролик туроператорлар Сурхондарё салоҳиятини ўргандилар
Бухоро вилояти туроператорлари Сурхондарёга ташриф буюриб, у ердаги туристик объектларни ўргандилар ҳамда ҳамкорликдаги йўналишлар ва турпакетларни муҳокама қилдилар.
Бухоролик туроператорлар Сурхондарёнинг туристик салоҳияти билан танишдилар
Бухоро вилоятининг етакчи туроператорлари учун Сурхондарё вилояти бўйлаб ахборот тури ташкил этилди. Ушбу ташаббус ҳудуднинг туристик салоҳиятини тарғиб қилиш ва ҳудудлараро ҳамкорликни ривожлантиришга қаратилган.
Саёҳат давомида Бухоро туризм бизнеси вакиллари Сурхондарёнинг тарихий-маданий мерос объектлари, қадимий зиёратгоҳлари, табиий ва экотуристик диққатга сазовор жойлари, шунингдек, вилоятнинг туристик инфратузилмаси билан танишдилар.
Инфотур иштирокчиларига амалдаги туристик йўналишлар, мавжуд имкониятлар ва ҳудудда соҳани ривожлантиришнинг истиқболли йўналишлари ҳақида маълумотлар тақдим этилди.
Сафар доирасида Бухоро ва Сурхондарё вилоятлари туроператорларининг учрашуви бўлиб ўтди. Томонлар қўшма туристик пакетларни ишлаб чиқиш, туристик маҳсулотларни ўзаро тарғиб қилиш ва ҳудудлар ўртасида сайёҳлар оқимини ошириш масалаларини муҳокама қилдилар.
Учрашув якунларига кўра, иштирокчилар янги туристик йўналишларни йўлга қўйиш ва икки вилоят туроператорлари ўртасидаги амалий ҳамкорликни кенгайтиришни таклиф қилдилар. Бухоро вилоятидан Сурхондарёга борувчи сайёҳлар сонини кўпайтиришга алоҳида эътибор қаратилди.
Ташкилотчиларнинг таъкидлашича, инфотурнинг ўтказилиши Бухоро ва Сурхондарёнинг туристик имкониятларини ўзаро тарғиб қилиш, туризм бизнеси вакиллари ўртасидаги ҳамкорликни мустаҳкамлаш ва ички туризм йўналишларини кенгайтиришга хизмат қилади.