Бутун Франция бўйлаб юз берган тартибсизликлардан сўнг Париж марказининг бир қисмида ва бошқа шаҳарларда комендантлик соати жорий этилди
Бу мамлакат ички ишлар вазири полиция баъзи шаҳарларда «назоратни йўқотганини» тан олганидан кейин юз берди.
**Франция бўйлаб юз берган тартибсизликлардан сўнг Париж марказининг бир қисмида ва бошқа шаҳарларда комендантлик соати жорий этилди**
Франция ҳукумати мамлакат бўйлаб дам олиш кунларида юз берган тартибсизликлар ва талончиликлардан сўнг Париж марказининг бир қисмида ва бошқа шаҳарларда тунги комендантлик соатини жорий этди.
Париж полициясининг маълум қилишича, комендантлик соати маҳаллий вақт билан соат 23:00 дан (Гринвич бўйича 21:00) 06:00 гача дам олиш кунлари намойишчилар тўпланган Республика майдонида (Place de la République) ва Ле-Аль (Les Halles) савдо ҳудудида амал қилади. Шу билан бирга, шаҳар марказининг бошқа бир қанча ҳудудларида ҳам рухсат этилмаган йиғилишларга тақиқ қўйилган.
Ёшларнинг ҳаракатланишини ва йиғилишларни чеклайдиган қисман комендантлик соати жанубдаги Марсель, Ницца ва Лион, шунингдек, шимолдаги Лилль ва бошқа шаҳарларда эълон қилинди.
Аввалроқ, истеъфоси Президент Эммануэль Макрон томонидан рад этилган Ички ишлар вазири Лоран Нуньес баъзи шаҳарларда полиция "назоратни йўқотганини" тан олган эди.
Тартибсизликлар ўтган ойда талабаларнинг мактаблардаги шароитларни яхшилашни талаб қилиши билан бошланган эди, аммо шундан бери норозиликлар кенгайиб, бошқа эътирозларни ҳам қамраб олди.
Расмийлар 2500 дан ортиқ киши ҳибсга олинганини маълум қилди. AFP ахборот агентлигига кўра, полициянинг оломонни тарқатиш учун мўлжалланган гранатаси портлаши оқибатида бир намойишчининг қўли узилиб кетган. 1000 га яқин полиция ходими жароҳат олган.
Дуншанба куни бўлиб ўтган инқирозли йиғилишдан сўнг, бош вазир қайси шаҳарлар жабрланишини айтмаган ҳолда, маҳаллий мерларга "зарур деб топган жойларида" комендантлик соати жорий қилиш ваколати берилаётганини айтди.
Мамлакатда фавқулодда ҳолат эълон қилиш эҳтимолини инкор этмаган Бош вазир Себастьян Лекорню, шунингдек, ҳукумат зарар кўрган ҳудудларни қайта тиклашга ёрдам бериш учун маблағ ажратишини, бу маблағлар вандализм учун жавобгарлардан ундириб олинишини таъкидлади.
"Мулкка зарар етказганлар уни тўлашини таъминлаш йўлларини топиш учун қонун қабул қилинади", деди Лекорню.
У, шунингдек, тартибсизликлар ва талончиликлар сабабли ишлай олмаган одамлар учун қисман ишсизлик жамғармасини эълон қилди.
Шу билан бирга, Нуньес 200 нафар терговчи эҳтимолий ташкилотчиларни аниқлаш мақсадида кузатув камералари тасвирларини ўрганаётганини айтди.
Нуньес якшанба куни истеъфога чиқишга уринди, аммо Макрон "ҳуқуқни муҳофаза қилиш органларини узлуксиз бошқариш заруратини ҳисобга олган ҳолда" буни рад этди, деб хабар берди Елисей саройи. Баёнотда айтилишича, Нуньес Макрон "разведка ва олдиндан кўра билмасликдаги камчиликлар" деб атаган ҳолатлар бўйича шаффоф бўлиши керак.
Франция Савдо-саноат палаталари (CCI) раҳбарининг айтишича, дам олиш кунларидаги зўравонликлардан 2000 дан ортиқ дўкон ва бошқа корхоналар бевосита зарар кўрган.
CCI раҳбари Ален Ди Крешенцо Франциянинг RTL телеканалига тартибсизликлардан кўрилган зарар "юзлаб миллион евро"га баҳоланганини айтди. CCI’нинг Марсель филиали президенти Жан-Люк Шовен BBC’га шаҳардаги кўплаб дўкон эгалари "чуқур қайғуда" эканини ва ўзининг омон қолишидан хавотирда эканини айтди.
Франция ҳукуматининг икки вазири талон-торож қилинган товарлар баъзи савдо платформаларида сотувга қўйилганини айтди. Vinted вакили ўғирланган товарларни сотиш ёки таклиф қилиш "қатьиян тақиқланганини" билдирди.
"Шу дам олиш кунларидан бери жамоаларимиз талончилик билан боғлиқ эълонларни аниқлаш ва ўчириш бўйича зудлик билан чоралар кўрди ва биз шубҳали эълонларни назорат қилишни кучайтирдик", дейилади хабарда.
Дам олиш кунлари 550 000 га яқин намойишчи ёқилғи нархининг ошиши, яшаш қиймати ва давлат хизматлари, жумладан, мактаблар аҳволи ёмонлашганига норозилик билдириб кўчаларга чиқди.
Париж, Марсель ва бошқа шаҳарлар ҳамда кичик шаҳарчаларда қора кийинган, ниқоб ва балаклава кийган тартибсизлар гуруҳи машиналар ва биноларга ўт қўйгани ҳамда корхоналарни талон-торож қилгани кўринган.
Марказий Лимож шаҳрида 19-асрга оид ҳашаматли шаҳар мэрияси биноси шанба куни тартибсизлик уюштирганлар томонидан чиқарилган ёнғин оқибатида вайрон бўлди, олов тарқалиши билан унинг соат минораси ва томи қулаб тушди.
АҚШнинг Франциядаги элчихонаси ўз фуқароларига сўнгги намойишлар таъсир кўрсатган ҳудудлардан қочишни тавсия қилувчи огоҳлантириш чиқарди.
Огоҳлантиришда, агар улар катта йиғилишлар яқинида бўлиб қолишса, "эҳтиёткорлик кўрсатиш" айтилади. Хитой ва Германия ҳам шунга ўхшаш огоҳлантиришлар берган.
Баъзи сиёсатчилар чапчи "Ла Франсе Инсоумисе" (Эгилмас Франция) партиясини зўравонликларда рол ўйнаганликда айблади, Лекорню аввалроқ ўтказилган матбуот анжуманида баъзи гуруҳлар "президентлик сайловларигача мамлакатимизда тартибсизлик яратишни хоҳлайди", деб таъкидлади.
Партия етакчиси, келаси йили бўлиб ўтадиган президентлик сайловларида номзодини қўядиган Жан-Люк Меланшон Франция Бош вазирини "айбловини исботлашга" ёки "кечирим сўрашга, жим бўлишга ва тартибсизликларни авж олдиришни тўхтатишга" чақирди.