«Бу таслим бўлишга ундашдек кўринмоқда»: Зеленский Трамп сиёсатини танқид қилди
Украина президенти Володимир Зеленский Доналд Трамп маъмуриятининг сўнгги ҳаракатлари Киевни Россияга қарши урушда таслим бўлишга ундашга ўхшаётганини билдирди. У АҚШни Старшиелд алоқасини атайлаб чеклаш ва Патриот тизимлари учун ракеталар етказиб беришни кечиктиришда айблади. Вашингтон эса алоқа чекловлари атайлаб жорий этилганини рад этмоқда.
«Бу таслим бўлишга ундашдек кўринмоқда»: Зеленский Трамп сиёсатини танқид қилди
ДВ хабарига кўра, Зеленский бу ҳақда 18-октабр куни Блоомберг агентлигига берган интервюсида айтган.
Украина раҳбари АҚШ Конгрессига 3-ноябрда бўлиб ўтадиган оралиқ сайловлар арафасида Киев учун «хавфли кунлар» бошланганини билдирган. Унинг айтишича, сайловолди даврида сиёсий кескинлик кучайган, у эса овоз беришдан кейин вазият юмшашига умид қилмоқда.
Зеленскийнинг даъвосига кўра, АҚШ Украина фойдаланаётган Старлинкънинг ҳарбий хизматлар пакети — Старшиелд ишини атайлаб чеклаган. Бундан ташқари, Патриот ҳаво ҳужумидан мудофаа тизимлари учун мўлжалланган тутиб қолувчи ракеталарни етказиб бериш ҳам кечиктирилмоқда.
У Трамп маъмурияти билан сўнгги музокараларда Россиядаги дизел ёнилғиси ишлаб чиқариш обьектларига зарбаларни тўхтатиш эвазига Украина обьектларини ҳимоя қилиш учун Патриот ракеталарини беришни таклиф қилганини айтган.
Зеленскийнинг сўзларига кўра, АҚШ томони эса фақат дизел ишлаб чиқаришга ҳужумлар тўхтатилишини истамоқда. Украина президенти зарбалар давом эца, бошқа имкониятлардан фойдаланиш ҳам чекланиши мумкинлигидан хавотир билдирган.
«Украинани таслим бўлишга кўндириш учун қадамлар ташланган деб ҳисоблайман», - деган Зеленский. Бироқ у буни АҚШнинг аниқ мақсади деб аташдан тийилган.
«Ҳамкорларимиз шу мақсадни кўзлаяпти, демаяпман. Америкалик ҳамкорларимиз урушни Украина ҳисобига тезроқ тугатиш мумкин деб ўйлашини истамайман. Аммо бу шундай кўринмоқда», - дея таъкидлаган у.
Зеленский, шунингдек, Трампнинг Владимир Путин билан муносабатларини яхши деб баҳолаган, аммо бу ҳозирча урушни тўхтатишга олиб келмаётганини айтган.
Украина Мудофаа вазирлиги маълумотига кўра, Старшиелд ишидаги чекловлар 14-октабрга ўтар кечаси пайдо бўлиб, учувчисиз тизимлар фаолияти ва логистикани қийинлаштирган. 15-октабрда эса вазирлик дала шароитида тизим иши тикланганини хабар қилган.
АҚШ давлат котиби Марко Рубио 17-октабрда Вашингтон алоқани атайлаб чеклагани ҳақидаги даъволарни рад этган. Трамп ҳам аввалроқ ўзи бундай кўрсатма бермаганини, Илон Маск ҳам буни қилган деб ўйламаслигини билдирган эди.