Бу ҳафтада иккинчи бор бир нечта Европа авиарейсларига бомба ўрнатилгани ҳақида таҳдидлар бўлди
Дублиндан Римга учаётган самолёт йўналишини ўзгартириб, Франция шимолига қўнди.
Европадаги бир нечта авиарейсларга шу ҳафта ичида иккинчи бор бомба ўрнатилгани ҳақида таҳдид бўлди, хабар берди расмийлар.
Пайшанба куни эрталаб Дублиндан учиб кетган Aer Lingus авиакомпаниясининг Airbus A320 самолёти фавқулодда сигнал юбориб, йўналишини ўзгартирди ва Франция шимолидаги Эврё авиабазасига қўнди.
Дарвоқе, Финляндиянинг Finnair авиакомпанияси Хельсинкидан Италия пойтахтига учаётган рейсларидан бири пайшанба куни бомба таҳдиди нишони бўлганини маълум қилди. Ҳарбий-ҳаво кучлари қирувчи самолётлари кузатиб борган ҳаво кемаси режалаштирилганидек қўнди.
Бу Буюк Британиядан учиб кетган иккита рейсни ўз ичига олган Европадаги сегизта парвоз тахминий бомба таҳдидлари нишони бўлганидан бир неча кун ўтиб юз берди. Текширувлардан сўнг самолётларнинг ҳеч биридан портловчи моддалар топилмади.
Aer Lingus ўз баёнотида Дублиндан Римга учаётган EI402 рейси "хавфсизлик чораси сифатида бугун эрталаб Нормандияга йўналтирилганини" билдирди.
Баёнотда шундай дейилади: "Рейс хавфсиз қўнди ва Aer Lingus йўловчиларни имкон қадар тезроқ якуний манзилига етказиш чораларини кўради."
Шу билан бирга, Миландан Варшавага учаётган Wizz Air рейси ҳам Австриянинг Вена шаҳрига йўналишини ўзгартиришдан олдин фавқулодда сигнал берди - гарчи бомба таҳдиди ҳақида хабар берилмаган бўлса-да, сабаби номаълумлигича қолмоқда.
Сешанба куни бомба ўрнатилгани ҳақидаги таҳдидлардан сўнг еттита самолёт текширилди.
Улардан иккитаси Буюк Британиядан эди – бири Манчестердан учиб, Испаниянинг Мурсия шаҳрига қўнди, бошқаси эса Лондон Ҳитроу аэропортидан Польшанинг Варшава шаҳрига учаётган эди.
Аноним хабарлардан сўнг Римга қўнгач текширилган Ryanair'нинг иккита рейсидан – бири Дублиндан, бошқаси Лиссабонни тарк этган – портловчи моддалар топилмади, хабар берди шаҳарнинг Фьюмичино аэропортидаги манбалар BBC'га.
Манбаларнинг қўшимча қилишича, полициянинг сапёрлар гуруҳи барча йўловчилар ва экипаж аъзоларининг хавфсизлигини таъминлаш учун стандарт хавфсизлик процедураларини амалга оширган, шундан сўнг хавф сигнали бекор қилинган.
Буюк Британия ҳукумати ушбу ҳодисаларни "ғаразли сохта таҳдидлар" деб таърифлади.