"Бронзали экскурсовод". Борис Голендернинг ўғли Тошкентнинг афсонавий тарихчиси ва ўлкашуноси хотирасига ўрнатиладиган ҳайкал борасидаги қарашлари билан ўртоқлашди
"Бронзали экскурсовод". Борис Голендернинг ўғли Тошкентнинг афсонавий тарихчиси ва ўлкашуноси хотирасига ўрнатиладиган ҳайкални қандай тасаввур қилишини сўзлаб берди
Куни кеча бир нечта жамоат ташкилотлари, ўлкашунослик ҳамжамиятлари ва Борис Голендернинг яқин дўстлари таниқли тарихчи хотирасини абадийлаштириш ташаббуси билан чиқишди. Турли хил таклиф ва ғоялар илгари сурилмоқда: кимдир пойтахт марказида бронзадан ҳайкал ўрнатиш керак деб ҳисобласа, бошқалар мемориал барельеф тарафдори, яна кимдир эса мемориал объектни Чорвоқда жойлаштириш вариантини кўриб чиқмоқда. Podrobno.uz мухбири тадқиқотчининг ўғли Глеб Голендер билан боғланиб, оила бўлажак ҳайкални қандай тасаввур қилишини билиб олди.
Глеб Голендернинг фикрича, агар лойиҳа амалга оширилса, у ҳаддан ташқари катта монументга айланиб кетмаслиги керак. У шаҳар муҳитига нафис тарзда уйғунлашган кичик, самимий арт-объектни энг муваффақиятли формат деб ҳисоблайди.
"Гап рамзий бир жойда турадиган кичик ҳайкал, ҳаммани пойтахт бўйлаб сайрга таклиф қилаётган ўзига хос "бронзали экскурсовод" ҳақида кетмоқда. Кўкрагида ўша доимий карнайи (рупори), кўзойнакда ва лабларида ним табассум билан", — дея ўртоқлашди Глеб Голендер ва бу ғояни амалга оширишда урбан-вандализмдан ҳимоя қилиш чораларини ҳам ўйлаб кўриш кераклигини қўшимча қилди.
Тадқиқотчи хотирасини сақлаб қолиш бўйича ташаббусларнинг фаол муҳокама қилинишини баҳолар экан, унинг ўғли оила бундай оммавий кампанияларга вазминлик билан ёндашишини таъкидлади. Унинг сўзларига кўра, Борис Анатольевичнинг ўзи ҳамиша жуда камсуқум инсон бўлган.
"Хотира — у барибир қалбда ва юракда, китобларда, тармоқда қолади. Дадам жуда камтар инсон эдилар ва ҳеч қачон баландпарвоз эътироф белгиларига интилмаганлар. Лекин, барибир, шаҳримиз кўчаларидан бирида катта Голендернинг бронзали ҳайкали пайдо бўлса, мен учун жуда ёқимли бўларди", — дея якунлади ўлкашуноснинг ўғли.
Таниқли тарихчи, ёзувчи ва ўлкашунос Борис Голендер 2026 йил 5 февралда 79 ёшида вафот этди. Ўнлаб йиллар давомидаги фаолияти давомида у Ўзбекистон ва хусусан Тошкент тарихининг энг таниқли билимдонларидан бирига айланди: экскурсиялар ўтказди, китоблар ёзди, телевидениеда чиқишлар қилди ва кўплаб медиалойиҳаларда минтақа ҳақида сўзлаб берди.