Болтиқбўйи давлатларида кучли бўрон кузатилди
Рига, Вилнюс ва Таллинн кўчаларини сув босган. Кўпчилик дарахтлар қулашидан жабрланган. Латвия ва Литвада икки киши ҳалок бўлган.
22-23-август кунлари Болтиқбўйи давлатлари – Латвия, Литва ва Эстония, шунингдек, Полша ва Беларус ҳудудларида кучли "Приска" сиклони ҳукм сурди. Ушбу бўрон кучли ёмғир ва сониясига 30 метрдан юқори тезликда эсган шамоллар билан кечиб, камида икки кишининг ҳаётига зомин бўлди. Қурбонлардан бири Литванинг шимоли-шарқидаги Аникшай туманида дарахт қулаши оқибатида ҳалок бўлган бўлса, Латвиянинг Елгава шаҳрида яна бир киши қулаган бино харобалари остида қолиб кетган.
Латвияда 14 киши тиббий ёрдамга мурожаат қилган, уларнинг баъзиларининг жароҳатлари жиддий эканлиги маълум қилинган. Жабрланганларнинг аксарияти дарахтлар ёки уларнинг шохлари қулаши натижасида жароҳат олган. Баъзи ҳолатларда одамлар устига дарахт қулаган автомобиллар ичида қамалиб қолган. Рига аеропорти рейсларнинг кечикиши мумкинлигидан огоҳлантириб, йўловчиларга парвозлар ҳақидаги маълумотларни доимий кузатиб боришни тавсия этган.
Литвадаги қутқарув хизматлари ҳам кўплаб жойларда дарахтлар қулаши ва бунинг натижасида бир кишининг жароҳатлангани ҳақида хабар берган.
Бўрон электр таъминотида кенг кўламли узилишларга сабаб бўлди, бунга асосан дарахтларнинг электр узатиш линияларига қулаши сабаб бўлган. Латвияда 250 мингдан ортиқ уй хўжалиги электрсиз қолган, Литвада эса бу рақам 150 мингдан ошган. Эстонияда шанба оқшомида электрдан узилган уй хўжаликлари сони қарийб 3,5 мингта бўлган бўлса, якшанба тонгига келиб бу кўрсаткич 2,6 мингтагача камайган. Полшада 145 мингдан ортиқ хонадонда электр таъминоти узилган, Беларусда эса 650 дан ортиқ аҳоли пунктида узилишлар қайд этилган.
Бундан ташқари, Латвияда ЛМТ ва Теле2 мобил операторларининг айрим мижозлари алоқадаги муаммолардан шикоят қилишган.
Латвия, Литва ва Эстония шаҳарларида кўчалар сув остида қолган. Эстониядан олинган маълумотларга кўра, бир кун ичида 50-70 миллиметр ёғин тушган, айрим ҳудудларда эса бу миқдор 90 миллиметрга етган. Кучли ёмғир туфайли баъзи дарёларда, жумладан, Рига шаҳридан оқиб ўтувчи Даугава дарёсида сув сатҳи кўтарилган. Шаҳарда транспорт ҳаракати, жумладан, автобусларнинг ҳаракати қийинлашган, фавқулодда хизматлар ходимлари йўллардаги сувни насослар ёрдамида чиқариб ташлашган. Шунингдек, кўплаб биноларнинг ертўлалари ва кўп қаватли уйларнинг биринчи қаватларини сув босган.
23-август куни ҳам ҳудудда шамол ҳақидаги огоҳлантириш ўз кучини сақлаб қолган.