«Болалик кутиб турмайди». Саида Мирзиёева Қаршидаги «ҳалокатли аҳволдаги» боғча, мактаб ва наркодиспансерда бўлди
Ўзбекистон Президенти Администрацияси раҳбари Саида Мирзиёева Қашқадарё вилоятига ташриф буюрди. У бир қатор янги лойиҳалар ҳамда таъмирталаб аҳволдаги «авария» ҳолатидаги боғча, мактаб ва наркология диспансери каби баъзи ижтимоий муассасалардаги шароитлар билан танишди.
«Болалик кутиб турмайди». Саида Мирзиёева Қаршидаги «авария ҳолатидаги» боғча, мактаб ва наркодиспансерда бўлди
Вилоят ҳокими Муротжон Азимов бир қанча лойиҳаларни, жумладан, сув таъминотини яхшилаш, туризмни ривожлантириш, шунингдек, соғлиқни сақлаш ва таълим соҳаларига оид ташаббусларни тақдим этди.
Хусусан, Қаршининг эски шаҳар қисмида, қадимий «Насаф» қалъаси ҳудудида сайёҳлар учун инфратузилмани модернизация қилиш режалаштирилмоқда.
Соғлиқни сақлаш соҳасида 2027 йилда вилоятда 10 та объектни реконструкция қилиш ва 1 та янгисини қуриш кўзда тутилган.
Яқин орада Қаршида Чап тармоқ каналини бетонлаш ва унинг қирғоқларини ободонлаштириш ишлари бошланади. Бу 1400 гектар ерни ва маҳаллий аҳолини сув билан таъминлаш имконини беради.
Канал бўйлаб ҳордиқ чиқариш ҳудудлари ва пиёдалар йўлакчалари пайдо бўлади, улар атрофдаги тўртта маҳалланинг 25 минг аҳолиси учун ўзига тортувчи масканга айланади, деб хабар берди Саида Мирзиёева.
Қаршида у 43-мактаб ва 1-боғчага ташриф буюрди. «Боғчанинг авария ҳолатида эканини, мактаб синфхоналари совуқ ва эски парталар турганини кўриш оғир бўлди. Бироқ болалик кутиб турмайди ва биз бу муаммоларни кечиктирмасдан ҳал қилишга мажбурмиз», — деб ёзди Президент администрацияси раҳбари Telegram’да.
Эски боғча ўрнида 360 ўринли янгисини қуришга қарор қилинди. Мактаб биноси тўлиқ таъмирланади ва «илғор лабораториялар, фаол ижодий тўгараклар ва, энг муҳими, алоҳида эҳтиёжли болалар учун инклюзив муҳитга эга замонавий ўқув маскани»га айлантирилади.
Шундан сўнг Саида Мирзиёева янги Қашқадарё илғор касбий маҳорат техникуми ўқувчилари ва жамоаси билан мулоқот қилди.
«Асосий мақсадимиз — боғчадаги илк қадамлардан тортиб то катта ҳаётга қадам қўйгунга қадар барча болаларимиз чин камносида муносиб шароитларда ўсиб-унгиши ва таълим олишини таъминлашдир», — дея таъкидлади у.
Президент администрацияси раҳбари, шунингдек, «вазиятни ичкаридан кўриш ва энг муаммоли жойларда ўзгаришларни жорий этишни бошлаш учун» вилоят наркология муассасасида ҳам бўлди.
«Даволашнинг асосий шароитлари ва шифокорларнинг профессионаллиги билан бир қаторда, бошига оғир кун тушган инсонга оддий инсоний меҳр-оқибат куч бағишлаши мумкин. Баъзан биргина самимий ҳамдардлик умидни ва мустаҳкам ишончни қайтаради. Ҳеч ким ёрдам сўрашдан қўрқмаслиги ва ўз дард-алами билан ёлғиз қолмаслиги керак», — деб ёзди у.
«Биз профилактика, даволаш ва реабилитация ягона кўп тармоқли жамоа қўлида аниқ ишлайдиган механизм сифатида фаолият юритадиган ягона тизимни яратишни мақсад қилдик», — дея қўшимча қилди Саида Мирзиёева.
Маҳаллий ва халқаро экспертлар билан биргаликда соҳани тубдан трансформация қилиш бўйича махсус дастур ишлаб чиқилмоқда. «Бу ишнинг марказида ҳамиша инсон, унинг қадр-қиммати ва соғлом ҳаётга қайтиш йўлидаги ҳар тарафлама қўллаб-қувватлаш туради», — деди у.