БМВ фойданинг пасайиши фонида электромобил ва люкс йўлтанламас ишлаб чиқаради
БМВ ходимларни, шу жумладан бошқарув лавозимларини қисқартириш, сунъий интеллект билан кўпроқ ишлаш, шунингдек, иккита янги моделни тақдим этиш ниятида. Бу компанияни қайта ташкил этиш режасига киради.
БМВ фойда камайиши шароитида электромобил ва люкс йўлтанламас ишлаб чиқаришга киришади
Агентлик ёзишича, Европа автомобил саноати суст талаб, Хитой ишлаб чиқарувчиларининг босими ва АҚШ божлари таъсири остида қолмоқда. Июн ойида БМВ Хитойдаги заиф натижалар сабаб фойда пасайиши юзасидан уч йилдан ортиқ вақт ичидаги учинчи огоҳлантиришини берди, бу эса одатда барқарорлиги билан танилган компания обрўсига зарар етказди, деб хабар қилди Реутерс.
Шу вазиятда БМВ Германияда қарийб 8 минг иш ўрнига таъсир қилиши кутилаётган қисқартириш дастурини бошлади. Шу билан компания харажатларни камайтираётган Волксваген ва Мерседес-Бенз қаторига қўшилди. БМВ 2027-йил ўрталарига бориб бўлинмалар ҳамда улар билан боғлиқ бошқарув лавозимлари сонини бешдан бир қисмга қисқартиришни режалаштирмоқда. Сунъий интеллект жараёнларни оптималлаштириш ва қарор қабул қилишни тезлаштиришда асосий восита бўлади.
Бундан ташқари, БМВ ўз маҳсулот стратегиясини асосий бозорларнинг турли йўналишларига мослаштирмоқда:
Европа — 2028-йилдан бошлаб бошланғич тоифадаги арзон электромобил ишлаб чиқаришни йўлга қўйиш режалаштирилган;
АҚШ — бадавлат мижозлар учун янги люкс йўлтанламас ишлаб чиқиш;
Хитой — ишлаб чиқаришни маҳаллийлаштиришни давом эттириш ва маҳаллий ҳамкорлар билан, жумладан автоном ҳайдаш технологиялари ҳамда интеграциялашган дастурий таъминот бўйича янада фаолроқ ҳамкорлик қилиш.
Шунингдек, Хитойдан Жануби-Шарқий Осиё мамлакатларига автомобил экспорт қилиш имконияти ҳам кўриб чиқилмоқда.