«Биз нонининг ичига пластик яширган оилани тутиб олдик»
Паблар ва ресторанлар тўламай кетишга уринаётган мижозлар нишонга айлангани ҳақида сўзлаб берди.
«Биз нонига пластик яширган оилани тутиб олдик»
Корнуолл графлигининг Ньюлин шаҳридаги «Mackerel Sky Seafood Bar» ресторани ходими Нина Маклин одамлар ўз овқатларига соч ёки пластик каби нарсаларни атайлаб солиб қўйганини кўрган
Сўнгги йилларда ресторан ва паблар Девон ва Корнуолл полициясига мижозларнинг пул тўламасдан кетиб қолгани билан боғлиқ юзлаб ҳолатлар ҳақида хабар беришди. Полиция ушбу жиноят ҳақида ҳали ҳам етарлича хабар берилмаётганини айтди ва бундан жабр кўрган корхоналарни ижтимоий тармоқларда ўзбошимчалик билан мурожаатлар жойлаштирмасликдан огоҳлантирди. Биз Корнуоллдаги Ньюлин шаҳрига ташриф буюриб, паб ва ресторан эгалари билан уларнинг овқатланиб, пул тўламай қочиб кетиш (dine and dash) ҳолатлари бўйича тажрибалари ва бунга қарши қандай курашганлари ҳақида суҳбатлашдик.
Ресторан кузатув камераси (CCTV) эркак ва аёлни тасвирга олди
«Бизда бир оила нон бўлаги ичига пластик солиб қўйиб, кейин гўёки уни тишлаб тишини синдириб олгандай кўрсатган эди».
Бу Нина Маклин сўнгги йилларда шаҳарчадаги ўзининг «Mackerel Sky Seafood Bar» ресторанида дуч келган овқатланиб, пул тўламай қочиб кетиш ҳолатларидан фақат биттасидир.
Кузатув камералари орқали мижозларнинг овқатларига пластик ва соч каби нарсаларни солаётганини тутиб олишдан ташқари, бошқалар шунчаки пул тўламасдан қочиб кетишган.
Шундай воқеалардан биридан кейин Маклин қоидабузарларни ижтимоий тармоқлар орқали топишга ҳаракат қилди.
«Шундан сўнг, эр-хотин бизга қўнғироқ қилиб, уларнинг юзлари акс этган тасвирларни ижтимоий тармоқлардан олиб ташлашимизни сўрашди. Биз агар улар ҳисобни тўлашса, постни жон-дилимиз билан ўчириб ташлашимизни айтдик, лекин улар бундан бош тортишди — пировардида бу ўғриликдир», деди у.
«Полиция бу борада кўп нарса қила олади деб ўйламайман, бу ачинарли, чунки бу одамларни бундай қилишдан тўхтатиб қолмайди. Лекин сиз шунчаки одамлар ҳалол бўлишига умид қилишингиз керак, ва одамларнинг аксарияти ҳалол ва виждонлидир».
Девон ва Корнуолл полицияси корхоналарни айбдорларни аниқлаш учун ижтимоий тармоқлардан фойдаланишдан кўра, бундай ҳолатлар юз берганда кўпроқ далилларни тақдим этишга чақирди.
Корнуоллнинг Ньюлин шаҳридаги «The Swordfish» пабидан Тревелян Вортнинг айтишича, ўтган йили мижозлар икки марта 140 фунт стерлингдан ортиқ ҳисобни тўламасдан чиқиб кетишган
Бошқа ресторан ва паблар ҳам пул тўламай қочиб кетган одамларни топиш учун ижтимоий тармоқлардан фойдаланишган.
Гавжум балиқчилик бандаргоҳи яқинида жойлашган «The Swordfish» пабининг бош менежери Тревелян Ворт ўтган йили мижозлар 140 ва 380 фунт стерлинглик ҳисобларни тўламасдан чиқиб кетишганини айтди.
Ушбу воқеалар ижтимоий тармоқларга жойлаштирилгандан сўнг, мижозлардан бири ниҳоят ўз ҳисобини тўлади, аммо иккинчиси ҳали ҳам ҳал этилмаган.
«Молиявий зарардан ташқари энг катта зарар — бу ишончнинг йўқолишидир», деди у.
«Ҳозирги кунда кўплаб корхоналарга борганингизда сиздан олдиндан тўлов қилиш талаб этилади. Мен эса ҳали ҳам ишонч асосида ишлайман».
Бир неча юз метр нарида, портга қараган «Fisherman's Arms» паби ҳам овқатланиб, пул тўламай қочувчилар билан боғлиқ тажрибага эга.
Порткурно яқинидаги «The Logan Rock Inn» ва Силли оролларидаги иккита пабнинг ҳам ҳаммуассиси бўлган Николас Жорж шундай деди: «Бизда тўрт ёки бешта шундай ҳолат бўлди ва биз уларни ижтимоий тармоқлар орқали топдик, улар ҳар сафар тўловни амалга оширишди».
Энди у одамлардан агар улар ташқарида ўтиришса ёки ходимлари мижозни танишмаса, буюртма бериш пайтида тўлов қилишни сўрайди.
«UK Hospitality» ташкилоти маълумотларига кўра, мижозларнинг овқатланиб, кейин тўламасдан кетиб қолиши ресторанларнинг учдан бирига таъсир қилади.
Девон ва Корнуолл полицияси сержанти Крис Чэлонернинг айтишича, агар кимдир ресторанда овқатланиб, кейин атайлаб тўламасдан чиқиб кетса, бу жиноий жавобгарликка сабаб бўлади.
У полицияда бу масала бўйича етарли маълумот йўқлигини тан олди, чунки хабар қилинган ҳолатлар даражаси юқори бўлмаган.
Би-би-сининг ахборот эркинлиги тўғрисидаги сўрови орқали олинган маълумотлар шуни кўрсатадики, 2022 йилдан бери Девон ва Корнуолл полициясига умумий овқатланиш корхоналаридан мижозларнинг тўламасдан қочиб кетгани ҳақида 234 та хабар келиб тушган.
Умуман олганда, ёқилғи қуйиш шохобчалари ва дўконлар каби барча шохобчаларни қўшиб ҳисоблаганда, бу кўрсаткич 2 802 тага етади.
Чэлонер шундай деди: «Бу ўғрилик ва биз бу билан шуғулланишимиз керак. Менинг маслаҳатим — ижтимоий тармоқларга ҳеч нарса жойлаштирманг, полицияга хабар беринг, бизга далилларни юборинг ва қолганини ўзимиз ҳал қиламиз».
Вақтинчалик бош комиссар Антони Харт ҳам жабрланувчиларни полицияга мурожаат қилишга чақирди.
У шундай деди: «Тасвир интернетга жойлаштирилгандан сўнг, уни бутунлай ўчириб ташлаш деярли имконсиз бўлади ва шахсларнинг нотўғри аниқланиши хавфи мавжуд.
Бу беайб одамлар ва уларнинг оилаларига жиддий зарар етказиши мумкин. Кадрлар ёки тасвирларда болалар ёки ёшлар акс этган бўлиши мумкин бўлган ҳолларда алоҳида эҳтиёткорлик чораларини кўриш керак.
Полиция суриштируви якунланмасдан олдин тасвирларни эълон қилиш терговга ҳам таъсир қилиши мумкин. Бу потенциал гувоҳларга таъсир қилиши, шахсни расмий таниб олиш жараёнларига халақит бериши ёки гумонланувчиларни полиция қизиқишидан огоҳлантириши мумкин, бу эса суриштирувни янада қийинлаштиради.
Кимнингдир шахсини аниқлашда жамоатчилик ёрдамини олиш учун ҳақиқий тергов зарурати туғилганда, полиция миллий йўриқнома ва қонунчиликка мувофиқ, тасвирларни назорат қилинадиган ва қонуний йўл билан тарқатиши мумкин».