Бишкекдаги ШҲТ саммити якунида 28 та ҳужжат имзоланди
ШҲТ 25 йиллигига бағишланган Бишкек декларацияси саммитнинг асосий сиёсий ҳужжати бўлди. Бундан ташқари, давлат раҳбарлари 2002-йил 7-июндаги ШҲТ Хартиясига ўзгартириш ва қўшимчалар киритиш тўғрисидаги баённомани тасдиқладилар.
Бишкекда бўлиб ўтган Шанхай ҳамкорлик ташкилоти (ШҲТ) юбилей саммити якунида жами 28 та ҳужжат имзоланди. Бу ҳақда Қирғизистон президентининг матбуот хизмати маълум қилди.
1-сентабр куни Қирғизистон Республикаси раҳбари Садир Жапаров раислигида Бишкекда ўтказилган саммитда Жапаров ШҲТ аъзо давлатлари дунё аҳолисининг 40 фоиздан ортиғини ва жаҳон ялпи ички маҳсулотининг қарийб тўртдан бирини ташкил этишини таъкидлади.
Ҳозирда ШҲТ таркибига ўнта давлат киради: Беларус, Ҳиндистон, Эрон, Қозоғистон, Хитой, Қирғизистон, Покистон, Россия, Тожикистон ва Ўзбекистон. Саммитда барча аъзо давлатлар етакчилари иштирок этиб, янги хавфсизлик марказларини ташкил этиш, гиёҳванд моддаларга қарши курашда ҳамкорликни кенгайтириш, рақамлаштириш, экология ва логистика масалаларини муҳокама қилдилар.
Саммитнинг асосий сиёсий ҳужжати ШҲТнинг 25 йиллигига бағишланган Бишкек декларацияси бўлди. Шунингдек, давлат раҳбарлари 2002-йил 7-июндаги ШҲТ Хартиясига ўзгартириш ва қўшимчалар киритиш тўғрисидаги баённомани тасдиқладилар.
Имзоланган ҳужжатлар орасида қуйидагилар ҳам бор:
* ШҲТ давлатлари хавфсизлигига доир таҳдид ва хатарларга қарши курашиш бўйича универсал марказ тўғрисидаги низом;
* Ташкилотнинг Наркотикларга қарши кураш маркази Ижроия қўмитаси тўғрисидаги низом. Унинг таркибига Бишкекда очиладиган Трансмиллий уюшган жиноятчиликка қарши кураш маркази киритилади;
* Наркотикларга қарши курашга оид иккита дастур. Улардан бири 2030-йилгача мўлжалланган бўлиб, наркотикка қарамликка қарши курашга бағишланган, иккинчиси эса 2030-йилгача синтетик гиёҳванд моддалар ва уларнинг прекурсорлари тарқалишига қарши чора-тадбирларни мувофиқлаштиришни назарда тутади;
* 2026–2028-йилларда халқаро ахборот хавфсизлигини таъминлаш бўйича ШҲТ давлатларининг ҳамкорлик режаси;
* 2026–2030-йилларда ШҲТ мамлакатларининг портлари ва логистика марказларини ривожлантириш бўйича ҳаракатлар режаси ҳамда бошқа ҳужжатлар.
Саммит давомида Қирғизистон ташкилотга раисликни Покистонга топширди.