«Биргаликда биз суверен давлатлар бўлиб қолиш учун зарур бўлган ресурслар ва шерикликларни таъминлай оламиз» — Марко Рубио
АҚШ ва Марказий Осиёнинг биргаликдаги иши мамлакатларга суверен бўлиб қолишга ва умумий фаровонликни оширишга ёрдам беради, деди Марко Рубио. Ҳамкорлик йўналишлари орасида у Транскаспий йўналиши, ўта муҳим минераллар ва технологик сектор учун мутахассислар тайёрлашни тилга олди.
«Биргаликда биз суверен давлатлар бўлиб қолиш учун зарур бўлган ресурслар ва шерикликни таъминлай оламиз» — Марко Рубио
Марказий Осиё мамлакатлари суверенитетни сақлаб қолиш ва умумий фаровонликни ошириш учун зарур бўлган ресурслар, инвестициялар ва савдо шерикликларини биргаликда таъминлашга қодир. Бу ҳақда АҚШ давлат котиби Марко Рубио минтақа мамлакатлари ва АҚШ ташқи ишлар вазирларининг C5+1 форматидаги учрашувида сўзлаган нутқида маълум қилди.
«Биргаликда биз мамлакатларимизга ҳар бир давлатимиз суверен бўлиб қолиши ва умумий фаровонлигимизни биргаликда оширишимиз учун зарур бўлган ресурслар, инвестициялар, имкониятлар ва савдо шерикликларини таъминлай оламиз», — деди у.
Унинг сўзларига кўра, C5+1 «фақат Американинг Марказий Осиё мамлакатлари билан яқинроқ, тинчликсевар муносабатларга бўлган қизиқишинигина эмас, балки унинг шундай муносабатларни ривожлантиришга содиқлигини ҳам акс эттиради».
Марко Рубио АҚШ ўз саноати ва етказиб бериш занжирлари хавфсизлигидан манфаатдор эканини таъкидлади.
«Биз Қўшма Штатларда суверен, мустақил иқтисодиётга эга мустақил мамлакат бўлиб қолиш ва ҳеч қачон ишончсиз хорижий шериклар ёки ҳатто рақибларга қарам бўлиб қолмаслик учун муҳим саноат тармоқларимиз ва уларни қўллаб-қувватловчи етказиб бериш занжирлари хавфсизлигини таъминлашга интиламиз», — деди у.
«Марказий Осиё инвестициялар ва экспорт учун идеал жой — барча мамлакатлар келажаги учун ҳаётий муҳим бўлган материаллар етказиб бериладиган марказий тугундир», — дея таъкидлади Марко Рубио.
Амалий ҳамкорлик йўналишлари ҳақида гапирганда, АҚШ давлат котиби транспорт инфратузилмасини, муҳим минералларни етказиб бериш занжирларини ривожлантириш ва мутахассисларни тайёрлашни тилга олди.
«Биз Транскаспий савдо йўналиши инфратузилмасини такомиллаштирамиз ва шерикларимизга АҚШ ва Марказий Осиё бозорларига чиқиш учун кўпроқ имкониятлар тақдим этамиз», — деди у.
«Биз муҳим минераллар бўйича мулоқот доирасида юқори қўшилган қийматга эга интеграциялашган етказиб бериш занжирларини ривожлантириш орқали энергетик келажагимизни таъминлаш устида ишлаймиз. Биз Марказий Осиёнинг ўсиб бораётган технология секторида илғор Америка технологияларидан фойдаланиш ва уларни техник қўллаб-қувватлаш учун минглаб ёш мутахассисларни тайёрлаймиз», — дея давом этди АҚШ давлат котиби.
Унинг сўзларига кўра, «B5+1» бизнес-форуми орқали ўзаро савдо ва инвестицияларни сезиларли даражада ошириш учун давлат ва бизнес ўртасидаги мулоқотга кўмаклашиш режалаштирилмоқда.
Марко Рубио, шунингдек, ўзи иштирок этган Вашингтондаги ўтган йилги «C5+1» учрашувини эслатиб ўтди.
«Оқ уйдаги ушбу ягона учрашувнинг ўзи 25 миллиард долларлик янги битимларни келтирди, бу битимлар транспорт, энергетика ва молия секторларимизни, шунингдек, иқтисодиётларимизнинг бошқа энг муҳим асосларини мустаҳкамлади», — деди у.
Унинг сўзларига кўра, АҚШ президенти Дональд Трамп ва Марказий Осиё мамлакатлари етакчилари ўшанда савдо ва инвестицияларни кенгайтиришга ёрдам берадиган тартибга солиш муҳити ва меҳнат бозори шароитларини шакллантириш мажбуриятини олган эдилар. Бу ҳафтадаги учрашувлар ушбу келишувларни вақтида бажаришга қаратилган.
«Бу ҳафта бу ерда йиғилган барча мамлакатлар — ўз маданияти ва манфаатларига эга бўлган ўзига хос, суверен, мустақил давлатлардир. Уларнинг ҳар бири ўз тақдирини ўзи белгилайди», — дея таъкидлади Марко Рубио.
«Биз Қўшма Штатларда уларнинг мустақил давлатлар сифатида гуллаб-яшнашини хоҳлаймиз. Биз бу йўлда уларнинг шериги бўлишни хоҳлаймиз», — дея хулоса қилди у.