Бир сўз билан таърифлаб бўлмайдиган Грузия: тоғлар, денгиз, таъм ва уйдагидек ҳис

Бир жумла билан ифодалаб бўлмайдиган Грузия: тоғлар, денгиз, таъм ва уйдагидек илиқлик

Баъзи давлатлар ёдда ўзининг диққатга сазовор жойлари билан қолади. Бошқалари эса хотирада бир туйғу каби муҳрланади. Грузия ана шундай мамлакатлардан бири.

Бу ерда бир неча кун ичида тоғлар бағрида уйғониб, кунни қадимий айвонлари замонавий меъморчилик билан ёнма-ён яшайдиган шаҳарда ўтказиш, кечқурун эса Қора денгиз тўлқинларидан завқ олиш мумкин. Илк бор хинкали татиб кўриш, қўшни столдан янграётган кўп овозли грузин қўшиғини эшитиш ва маҳаллий аҳоли нега “Меҳмон атойи Худо” иборасини тез-тез такрорлашини тушуниб етиш мумкин.

Европа ва Осиё чорраҳасида жойлашган Грузия бир сафарда кам учрайдиган нарсаларни — Кавказ тоғлари ва субтропик соҳилни, қадимий шаҳарлар ва замонавий маданиятни, гастрономия, вино, саргузаштлар ҳамда машҳур грузин меҳмондўстлигини ҳайратланарли тарзда уйғунлаштиради.

### Кавказ чўққиларидан Қора денгизгача

Тбилисидан чиқишингиз билан манзара деярли кинематографик тарзда ўзгаришни бошлайди.

Айнан шу манзаралар алмашинуви Грузия бўйлаб саёҳатнинг асосий ўзига хос жиҳатларидан биридир. Бу ерда табиат шунчаки фон эмас — у саёҳатнинг бир қисми.

Шундан кейин тоғ ҳавосини денгизга алмаштириш мумкин. Батуми ва Қора денгиз соҳили Грузиянинг бутунлай бошқа — янада сокин, субтропик ва замонавий қиёфасини намоён этади.

Узун Батуми булвари кундузи велосипедда сайр қилиш учун яратилгандек, кечқурун эса шаҳар аста-секин денгиз томон силжиб, қуёшни уфқ ортига кузатади.

### Тбилиси: жуда пухта режалаштирмаган маъқул бўлган шаҳар

Чунки Тбилиси ўзингизга бироз адашишга имкон берганингиздагина янада чиройли кўринади.

Эски ёғоч айвонлар, тошли кўчалар, кичик ҳовлилар, ибодатхоналар ва замонавий меъморчилик бу ерда шу қадар табиий уйғунлашганки, гўё шаҳар ҳеч қачон ўтмиш ва бугун ўртасида танлов қилишга уринмагандек.

Канат йўли орқали Нарикалага кўтарилиб, шаҳарга юқоридан назар ташлаш, сўнг яна эски кварталларга тушиш мумкин. Тбилиси билан ҳақиқий танишув айнан ўша ерда, сайёҳлик харитаси бўйича эмас, балки кафедаги стол устида, ҳовлида ёки тасодифий суҳбат чоғида юз беради.

Албатта, шаҳарнинг яна бир жиҳати бор — машҳур олтингугуртли ҳаммомлар. Илиқ сув ва ўзига хос олтингугурт ҳиди Тбилиси тарихининг бир қисмига айланган ва бошқа ҳеч бир шаҳар билан адаштириб бўлмайдиган таассуротлардан биридир.

Кхинча шаршараси.

Грузияда саёҳат муқаррар равишда гастрономияга айланади. Эҳтимол, Грузияни англашнинг энг яхши йўли — шунчаки дастурхон атрофига ўтиришдир.

Хачапури бу ерда турли ҳудудларга хос кўринишларда тайёрланади. Хинкали қўл билан ейилади — аввал иссиқ шўрвасини ичиб олиш учун хамири эҳтиёткорлик билан тишлаб олинади. Мцвади оловда пиширилади, унинг ёнига эса ткемали, пишлоқлар, сабзавотлар, кўкатлар ва ёнғоқли таомлар тортилади.

Грузия таъми.

Грузин гастрономияси фақат таомлар рўйхатидан иборат эмас. Бу ерда дастурхон суҳбат масканига айланади. Таом одамларни бирлаштиради, суҳбатлар чўзилади, қадаҳ сўзлари айтилади, мусиқа янграйди — ва оддий кечки овқат осонгина саёҳатнинг энг ёрқин лаҳзаларидан бирига айланади.

Грузияга сафаридан сўнг блогер Севара Мансурова айнан шу жиҳатни, айниқса, яхши эслаб қолган:

“Бу ерда таом шунчаки дастурхондаги овқат эмас, бирга йиғилиш, суҳбатлашиш ва ҳис-туйғуларни бўлишиш учун баҳона”.

### Грузиядаги энг асосий таассурот — бу одамлар

Грузин маданиятида “Меҳмон атойи Худо” деган ибора мавжуд бўлиб, саёҳатчи мамлакат ҳақида гап кетганда бу жумла нега шунчалик кўп янграшини жуда тез англаб етади.

Бу ерда меҳмондўстлик фақат тўкин дастурхонда акс этмайди. Бу — даврага қўшилиш, яна бир таомни татиб кўриш, оила тарихини тинглаш ёки дастурхон атрофида режалаштирилганидан бироз кўпроқ қолиб кетиш таклифидир.

Август ойининг бошида Грузия Миллий туризм администрацияси кўмагида Қозоғистон ва Ўзбекистондан бир гуруҳ блогерлар мамлакатга ташриф буюрди. Саёҳат йўналиши Тбилиси, Кутаиси ва Батуми, тарихий ва маданий масканлар, Мартвили канёни ҳамда Қора денгиз соҳилини қамраб олди.

Саёҳатдан сўнг Севара Мансурова грузин меҳмондўстлигини шундай ифодалади:

“Грузияда ўзингизни худди яқин дўстингизникига меҳмонга келгандек ҳис қиласиз”.

Кутаиси.

### Бир мамлакат — бир-биридан бутунлай фарқ қиладиган бир нечта саёҳат

Эҳтимол, Грузиянинг асосий сири ҳам шундадир.

У сизни шаҳар бўйлаб қисқа сайр ва табиат, тоғлар ва денгиз, гастрономия ва саргузаштлардан бирини танлашга мажбур қилмайди. Буларнинг барчаси битта саёҳат йўналишининг бир қисмига айланиши мумкин.

Аммо энг қизиғи уйга қайтгандан кейин бошланади.

Хотирада нафақат денгиз, тоғ ёки таомлар, балки янги ёпилган ноннинг ҳиди, узоқ давом этган кечки овқат, Кавказ орқали ўтган йўл, Қора денгизнинг шовқини ва тасодифан учратган инсонингиз ҳам қолади. У билан хайрлашаётганингизда эса аллақачон эски танишлардек бўлиб қолгансиз.

Эҳтимол, шунинг учун ҳам Грузияга шунчаки бориб келиш қийиндир.

Қайтиб келиш истаги эса жуда осон туғилади.