Би-би-си Африка хизматининг фахрий мухбири Марк Дойл вафот этди
Дойл 1990 ва 2000-йиллардаги Африка можаролари, хусусан, Руанда ва Сьерра-Леонедаги воқеаларни ёритиши билан машҳур эди.
Би-би-сининг Африка бўйича фахрий мухбири Марк Дойл вафот этди
1990 ва 2000 йиллардаги Африка можароларини ёритиши билан кенг танилган британиялик журналист Марк Дойл қисқа муддатли хасталикдан сўнг вафот этди.
Африкада бир муддат яшаганидан кейин у 1986 йилда Би-би-сига ишга кирди. Дойл 1993 йилда Шарқий Африка бўйича мухбир бўлди ва бир йил ўтиб Руандадаги геноцид ҳақидаги репортажлари билан ном қозонди.
1997 йилдан 2002 йилгача Ғарбий Африка бўйича мухбир сифатида у Сьерра-Леонедаги шафқатсиз фуқаролар урушини ва Либериядаги можаро оқибатларини ёритди.
Дойлнинг вафотидан кейин Би-би-сининг хорижий янгиликлар бўйича муҳаррири Пол Данахар уни «афсонавий шахс», шунингдек, «иқтидорли, жасур ва ҳамдардлик туйғусига эга мухбир» деб таърифлади.
Дойл билан бирга ишлаган Би-би-си мухбири Эндрю Хардинг 2015 йилда ҳамкасбининг миллий телерадиокомпаниядан кетиши муносабати билан чоп этилган мақолада унга ҳурмат бажо келтирган эди.
Ушбу мақолада Би-би-сининг Африкадаги яна бир таниқли мухбири Фергал Кин уларнинг 1994 йилда Руандада бирга бўлган вақтларини ёдга олган. «У ҳаммамиздан кўра узоқроқ қолди», деган эди Кин Дойл ҳақида. «Ўша даҳшатли вақтда ўша даҳшатли жойда бўлганлар Марк Дойл ҳақиқат йўлида ва Би-би-си учун нималарни қурбон қилганини билишади».
Худди шу мақолада, 2000 йилда Сьерра-Леонедаги фуқаролар урушини тўхтатишга уринган Британия кучларига раҳбарлик қилган сэр Дэвид Ричардс ҳам Дойлни олқишлаган.
Сэр Дэвиднинг айтишича, Дойлнинг репортажлари Буюк Британия ҳукуматини қатъий аралашув зарурлигига ишонтиришга ёрдам берган. «Бунинг натижасида акс ҳолда катта хавф остида қоладиган минглаб Сьерра-Леонеликларнинг ҳаёти сақлаб қолинди», деди у.
2004 йилда Дойл урушдан кейинги Либерия ҳақидаги репортажлари учун БМТ Мухбирлар уюшмаси/БМТ Жамғармаси мукофотининг биринчи совринини қўлга киритди.
Кейинчалик у Би-би-сининг Жаҳон янгиликлари бўйича мухбири бўлди ва 2015 йилда Би-би-сидаги фаолиятини якунлаб, нафақага чиқди.