Беёнсе 45 ёшда: жаҳон юлдузининг хиёнат, оналик ва миллиард долларлик империя ортидаги ҳаёти ҳақида

**Беёнсе 45 ёшда: жаҳон юлдузининг хиёнат, оналик ва миллиард долларлик империя ортидаги ҳаёти ҳақида**

Бугун, 4-сентябр куни жаҳон мусиқасининг энг машҳур юлдузларидан бири — Беёнсе 45 ёшга тўлди. Қарийб 30 йил давом этган фаолияти давомида у оддий хонандадан глобал поп-маданият тимсолига айланди. Унинг номи нафақат мусиқа, балки мода, кино, бизнес ва аёллар имкониятлари билан ҳам боғланади.

Беёнсе Гиселле Ноулз 1981-йил 4-сентябрда Техас штатининг Ҳюстон шаҳрида туғилган. Унинг отаси Метю Ноулз бизнес билан шуғулланган, онаси Тина Ноулз эса стилист ва дизайнер бўлган. Беёнсенинг синглиси Соланж ҳам кейинчалик таниқли хонандага айланди.

Бўлажак юлдузнинг мусиқага қизиқиши болалигидан бошланган. У турли танловларда қатнашиб, рақс ва вокал билан шуғулланган. Ота-онаси қизининг истеъдодини ривожлантиришига катта эътибор берган.

1990-йилларда Беёнсе “Дестинйъс Чилд” гуруҳи таркибида машҳурликка эришди. Гуруҳ дунёдаги энг муваффақиятли аёллар жамоадан бирига айланди. Кейинчалик Беёнсе яккахон фаолиятини бошлади ва “Сразй ин Лове”, “Сингле Ладиес”, “Ҳало” каби қўшиқлар орқали жаҳон юлдузига айланди.

Унинг “Дангероуслй ин Лове”, “БъДай”, “И Ам... Саша Фиерсе”, “Беёнсé”, “Лемонаде”, “Ренаиссансе” ва “Совбой Сартер” албомлари хонанданинг турли ижодий даврларини акс эттиради. Айниқса, “Лемонаде” ва “Совбой Сартер” унинг шахсий кечинмалари ҳақида эди.

Репер ва тадбиркор Жай-З билан муносабати 2000-йилларнинг бошларида бошланган. Дастлаб жуфтлик муносабатларини оммадан яширишга ҳаракат қилган.

2003-йилда улар “Сразй ин Лове” қўшиғида биргаликда ишлади. Кейинчалик бу қўшиқ нафақат Беёнсенинг энг катта хитларидан бирига, балки уларнинг севги ҳикоясининг рамзига айланди.

2008-йилда Беёнсе ва Жай-З турмуш қурди. Тўй Ню Ёркдаги Жай-Зънинг уйида ўтказилган. Маросимда фақат энг яқин инсонлар қатнашган.

Уларнинг никоҳи бошиданоқ идеал бўлмаган. Жай-Зънинг хиёнати ҳақидаги гап-сўзлар йиллар давомида матбуотда муҳокама қилинди. Беёнсе эса бу мавзуга 2016-йилда чиққан “Лемонаде” албомида мурожаат қилди.

Албомдаги қўшиқлар ва клипларда хиёнат, алам, кечирим ва оилани сақлаб қолиш каби мавзулар очиб берилди. Жай-З ҳам кейинчалик ўз хатосини тан олди. Шунга қарамай, эр-хотин ажрашмай, муносабатларини сақлаб қолди.

Бугунги кунда Беёнсе ва Жай-З нафақат турмуш ўртоқ, балки мусиқа ва бизнесдаги ҳамкорлар сифатида ҳам танилган.

2012-йил 7-январда Беёнсе ва Жай-Зънинг биринчи фарзанди — Блуе Ивй дунёга келди. Қизалоқнинг туғилиши жаҳон матбуотида катта воқеага айланди.

Блуе Ивй ота-онасининг изидан бориб, мусиқа ва ижодга қизиқа бошлади. У ёшлигиданоқ онасининг саҳна лойиҳаларида иштирок этди. 2020-йилда “Бровн Скин Гирл” клипидаги иштироки учун Блуе Ивй БЕТ мукофотига сазовор бўлди.

2017-йилда эса Беёнсе Инстаграмъга суратини жойлаштириб, ҳомиладорлиги ҳақида хабар берди. Сурат қисқа вақт ичида ижтимоий тармоқ тарихидаги энг машҳур постлардан бирига айланди.

Ўша йилнинг июн ойида Беёнсе ҳамда Жай-Зънинг Руми ва Сир исмли эгизаклари туғилди.

Шундан сўнг Беёнсе оилавий ҳаётини янада кўпроқ ҳимоя қила бошлади. У фарзандларининг шахсий ҳаётини оммага имкон қадар камроқ кўрсатишга ҳаракат қилади. Шунга қарамай, болалари вақти-вақти билан клиплари, консертлари ва бошқа лойиҳаларида кўриниш беради.

Беёнсенинг ҳаётида онаси Тина Ноулзнинг ўрни жуда катта. Тина қизининг дастлабки саҳна либосларини яратган ва унинг фаолиятида узоқ вақт давомида ёнида бўлган.

Бироқ оилада ҳаммаси доим ҳам силлиқ кечмаган. Беёнсенинг ота-онаси 2011-йилда ажрашган. Бунга Метю Ноулзнинг хиёнати сабаб бўлгани ҳақида хабарлар тарқалган.

Беёнсе кейинчалик отаси билан ҳамкорлик қилмай қўйди, фаолиятини мустақил бошқара бошлади.

Беёнсенинг муваффақиятида отаси Метю Ноулзнинг ҳам катта ҳиссаси бор. У қизининг карьерасини бошқарган ва “Дестинйъс Чилд” гуруҳининг менежери бўлган.

Бироқ Беёнсе вақт ўтиши билан фаолияти устидан тўлиқ назоратни қўлга олишни истади. Бугун у мусиқа билан чекланиб қолмаган, ўзининг мода ва бизнес лойиҳаларини ҳам ривожлантираётган мустақил тадбиркор сифатида танилган.

Беёнсе миллионлаб мухлислар олдида чиқиш қиладиган глобал суперюлдуз бўлса-да, интервюларида оиласи унинг ҳаётидаги энг муҳим қадрият эканини кўп бора таъкидлаган.

У ва Жай-З фарзандларини имкон қадар оддий муҳитда тарбиялашга ҳаракат қилади. Бироқ ота-онасининг машҳурлиги сабаб Блуе Ивй, Руми ва Сир болалигидан омма эътиборида.

45 ёшида у ортда улкан мусиқий мерос, ўнлаб рекордлар ва миллионлаб мухлисларни қолдирди. Аммо Беёнсенинг ҳикояси фақат “Сразй ин Лове” ёки “Сингле Ладиес” каби хитлардан иборат эмас.

Бу — болалигидан катта орзу қилган қизнинг жаҳон юлдузига айланиши, севги ва хиёнатни бошдан кечириши, уч фарзанднинг онаси бўлиши ва шу билан бирга ўз карьерасини давом эттириши ҳақидаги ҳикоя.

Балки Беёнсенинг энг катта муваффақияти ҳам шундадир: у саҳнада миллионлаб одамлар учун юлдуз бўлса, саҳнадан ташқарида эса аввало она, рафиқа ва қиз бўлиб қолишга интилади.

У ҳозирда 35 та “Гремми” мукофоти билан ушбу мукофот тарихидаги энг кўп “Гремми” олган ижодкор ҳисобланади. Шунингдек, унинг ҳисобида 99 та “Гремми” номинацияси бор — бу ҳам рекорд натижа.

2023-йилда Беёнсе 32 та “Гремми” билан мукофот тарихидаги энг кўп ғолиб чиққан ижодкорга айланган эди. 2025-йилда эса “Совбой Сартер” албоми унга яна учта мукофот олиб келиб, умумий ҳисобни 35 тага етказди. Энг муҳими, хонанда ниҳоят “Йил албоми” номинациясида илк бор ғалаба қозонди.

“Совбой Сартер” яна бир тарихий натижани қайд этди: Беёнсе “Энг яхши кантри албоми” номинациясида “Гремми” олган илк қора танли аёл бўлди. Шу тариқа у нафақат поп ва Р&Б, балки кантри мусиқасида ҳам ўз номини тарихга ёзди.