BBC махфий равишда озод этилганини фош қилганидан кейин, ўқувчига нисбатан жинсий зўравонлик қилган ўқитувчи Индонезия қамоқхонасига қайтарилди

Ўқувчига нисбатан жинсий зўравонлик қилган ўқитувчи BBC унинг яширинча озод этилганини фош қилганидан кейин Индонезия қамоқхонасига қайтарилди

Ўқувчи қизга нисбатан жинсий зўравонлик қилган собиқ ўқитувчи, BBC суриштируви унинг яширинча муддатидан олдин озод қилинганини фош этганидан сўнг, Индонезияда қайтадан қамоқхонага юборилди.

Бечи номи билан танилган Мочамад Субчи Азал Тсани 2022 йилда Шарқий Явадаги отасига тегишли машҳур ислом интернат-мактабида (у ерда ўқитувчи бўлиб ишлаган) ўқувчи қизга жинсий зўравонлик қилганликда айбдор деб топилиб, етти йиллик қамоқ жазосига ҳукм қилинган эди.

BBC Eye яширин суриштируви шуни аниқладики, у жазо муддатининг ярмидан камини ўтаганидан кейин, 2025 йил август ойида шартли равишда озодликка чиқарилган. У зўравонлик қилганликда айбланган аёлга, хабардор қилиниш бўйича қонуний ҳуқуққа эга бўлишига қарамай, бу ҳақда айтилмаган.

У собиқ ўқитувчининг яна панжара ортига қайтганини билганида, енгилликдан йиғлаб юборди.

«Мен бундай ҳолат бошқа ҳеч кимнинг бошига тушмаслигини ва бундан буён Индонезияда қонунлар адолатли қўлланилишини сўраб дуо қиламан», деди исми сир қолишини сўраган собиқ ўқувчи BBC’га.

Иммиграция ва жазони ижро этиш вазирлиги аввалроқ BBC’га Бечининг қоидаларга мувофиқ берилган жазо муддатини қисқартиришлар туфайли озод қилинганини айтган эди.

Бироқ, BBC суриштируви жамоатчилик ғазабини қўзитиб, қонун чиқарувчиларни текширув ўтказишга чақиришга ундади, шундан сўнг ҳукумат тўлиқ қайта кўриб чиқишни эълон қилди.

Ушбу қайта кўриб чиқиш натижасида Бечининг шартли озод этилишига олиб келган «хатолар» аниқланди. Энди у қамоқхонага қайтарилди.

Иммиграция ва жазони ижро этиш вазири Агус Андрианто BBC’га Бечининг шартли озод этилишини маъқуллаганлар «албатта санкцияларга дуч келишини» айтди.

«Биз бундай хатолар ёки қонунбузарликлар бошқа такрорланмаслигини таъминламоқчимиз», деди у.

Бечини зўрлашда айблаган бир неча аёллардан бири Ира Пуспитасари (ўнгда) бу хабарни эшитиб «ҳайратда қолганини» айтди

Бечини жинсий зўравонликда айблаган ва унинг судида кўрсатма берган бир неча собиқ ўқувчилардан бири Ира Пуспитасари учун бу қарор адолат қарор топганини англатади.

«Мен ҳақиқатан ҳам ҳайратдаман. Ҳукумат бу ишга бунчалик батафсил эътибор қаратишини ва биз жабрланувчиларга ҳақиқатан ҳам эътибор беришини кутмагандим», деди у.

Анонимлик бўйича қонуний ҳуқуқидан воз кечган Ира BBC’га Бечи уни 15 ёшидан бошлаб тўрт йилдан кўпроқ вақт давомида зўрлагани ва жинсий зўравонлик қилганини айтди.

«Менга унинг қулидек муносабатда бўлишди. Мени асирликда ушлаб туришди, зўрлашди, калтаклашди», деди у.

Унинг айтишича, у қочишга ҳаракат қилган, бироқ Бечининг шахсий қўриқчилари уни топиб, ўғирлаб кетишган ва чеккадаги кулбага олиб боришган, у ерда Бечи уни қийнаган ва зўрлаган.

У ҳамма нарсани полицияга хабар қилганини, аммо кейин шикоятини қайтариб олиш учун босимга учраганини айтди. У шунингдек, Бечининг онаси унга «ҳеч нарса бўлмаганини» айтишни буюрган аудиоёзувни ҳам тақдим этди.

Март ойида, у ҳали қамоқда бўлиши керак бўлган вақтда, Бечининг тадбирда табассум қилиб, тарафдорлари билан саломлашаётгани акс этган BBC’нинг яширин тасвирларини кўргач, Ира кўз ёшларини тия олмади.

«Гўё ҳеч нарса бўлмагандек», деди у.

Ира шу ҳафта BBC суриштирувига жавобан диний ва таълим муассасаларида жинсий зўравонлик ҳолатлари давлат томонидан қандай ҳал қилиниши бўйича ўтказилган парламент эшитувига таклиф қилинди.

Таълим муассасаларидаги зўравонликнинг бир неча қурбонларини ҳимоя қилган адвокат Жоко Жумади ҳам эшитувда сўзга чиқиб, расмийлар кўпинча зўравонлик ҳақидаги айбловларни текширишни истамасликларини, чунки улар «катта издошларига эга бўлган нуфузли диний арбоблар» билан боғлиқ эканлигини айтди.

У эшитувда бундай ишларни ўз зиммасига олгани учун мунтазам равишда таҳдид ва қўрқитишларга дуч келганини айтди.

Бечи Шарқий Яванинг Жомбанг шаҳридаги «Шиддиқия» ислом интернат-мактаби асосчиси, таниқли ислом уламоси Муҳаммад Мухтор Муътининг ўғлидир.

У 2022 йилда, тарафдорлари уни ҳибсга олинишига йўл қўймаслик учун тўпланган мактабда полициянинг 15 соатлик қамалидан кейин ҳибсга олинган эди.

Прокурорлар Бечи бир неча ўқувчи томонидан зўрлашда айбланганидан кейин узоқроқ муддатга озодликдан маҳрум қилишни сўрашган эди, бироқ у зўрлаш айбловлари бўйича оқланди ва бир ўқувчига нисбатан жинсий зўравонлик қилиш каби енгилроқ жиноятда айбдор деб топилди.

BBC ўз суриштируви давомида Бечи, унинг онаси ва «Шиддиқия» интернат-мактабидан изоҳ олишга ҳаракат қилди, бироқ ҳеч қандай жавоб олмади.