Barclays сунъий интеллектдан фойдаланишни ошириши муносабати билан 5 000 та иш ўрнини қисқартирмоқда
Банк СИнинг кўпроқ қўлланилиши унинг ишчи кучи 5% га қисқаришига олиб келаётганини айтмоқда.
Barclays ўз фаолиятида сунъий интеллектдан (СИ) фойдаланишни кенгайтираётгани сабабли жорий йилда 5 000 га яқин иш ўрнини қисқартиради.
Банк гуруҳининг маълум қилишича, 1 000 та штат аллақачон тугатилган ва 2026 йил охиригача яна 4 000 та иш ўрни қисқартирилиши кутилмоқда.
Қисқартиришлар унинг глобал ишчи кучининг 5 фоизини ташкил этади, таъсирга учраган лавозимларнинг аксарияти оператив ва функционал соҳаларга тўғри келади.
Barclays’нинг таъкидлашича, қисқартиришлар технологияларга киритилган инвестициялар натижасидир, чунки СИ айрим иш жараёнлари самарадорлигини оширишга ёрдам бермоқда.
Банк асосан Буюк Британиядаги чакана банк бизнесини нишонга олган уч йиллик харажатларни қисқартириш кампаниясининг якунига яқинлашмоқда, гарчи бу инвестбанкинг бўлимига ҳам таъсир кўрсатган бўлса-да.
Barclays шунингдек, охирги уч ойлик ҳисобот даврида 2,3 миллиард фунт стерлинг фойда кўрганини маълум қилди, бу ўтган йилнинг мос даврига нисбатан юқори, аммо кутилганидан сал камроқдир.
Иқтисодчилар янги технологияларга, айниқса СИга киритилаётган инвестициялар самарадорликни ошириш ва ходимлар сонини камайтириш орқали кундалик фаолиятни ўзгартираётгани далилларини топиш учун компаниялар натижаларини диққат билан ўрганмоқдалар.
Barclays гуруҳи бош ижрочи директори Си-Эс Венкатакришнаннинг таъкидлашича, иш ўринларининг қисқартирилиши "бир неча йил давомида технологияларга киритган ва киритишда давом этаётган инвестицияларимиз натижасидир".