Автомобиль уриб кетган австралиялик депутатга қилинган ҳужум ҳақида нималар маълум

Австралия парламенти депутатининг автомобиль томонидан уриб кетилиши билан боғлиқ эҳтимолий ҳужум ҳақида нималар маълум

Австралия парламенти депутати Хелен Хейнс Бош вазир Энтони Албаниз "қасддан қилинган ҳаракат" деб таърифлаган ҳодисада автомобиль уриб кетиши оқибатида оғир жароҳатлар билан шифохонага ётқизилди.

Хейнс душанба куни тушдан кейин маҳаллий вақт билан Мельбурннинг шимоли-шарқидаги Вангаратта шаҳридаги офис яқинида уриб кетилган.

Албанизнинг таъкидлашича, терговда аксилтеррор полицияси ҳам иштирок этмоқда.

Виктория штати полициясининг маълум қилишича, Хейнсни Тарравинжида яшовчи 43 ёшли эркак бошқарган оқ рангли Toyota Landcruiser автомобили уриб кетган.

Гумонланувчи полиция ходимлари томонидан ҳибсга олинишидан олдин воқеа жойида ўткинчи томонидан ушланган, деб қўшимча қилди полиция.

Ҳуқуқни муҳофаза қилиш органларининг маълум қилишича, Toyota ичидан пичоқ ҳам топилган.

Виктория полицияси гумонланувчи ва Хейнс бир-бирини билган-бимагани ҳозирча номаълумлигини ва тергов давом этаётганини билдирди.

Хейнс — Австралиянинг жануби-шарқидаги Виктория штатининг Инди округидан сайланган 65 ёшли мустақил депутат.

Унинг веб-сайтидаги таржимаи ҳолига кўра, у Викториянинг жануби-ғарбидаги сут-чорвачилик фермасида тўрт ака-укаси билан бирга ўсган, кейинчалик ҳамширалик ва доялик йўналишида таҳсил олган.

Таржимаи ҳолда айтилишича, у 26 ёшида Викториядаги Chiltern Bush Nursing Hospital касалхонасига бош ҳамшира бўлган, кейинчалик уч фарзандини тарбиялаш ва ишлаш билан бирга жамоат саломатлиги бўйича магистрлик даражасини ва тиббиёт фанлари доктори (PhD) илмий даражасини олган. У оиласи билан Вангаратта ташқарисидаги кичик чорвачилик фермасида яшайди.

У илк бор 2019 йилда Австралия Вакиллар палатасига сайланган ҳамда 2022 ва 2025 йилларда қайта сайланган.

Хейнснинг оиласи ҳодиса унинг Виктория штатидаги Мельбурн шаҳридан бир неча соатлик шимоли-шарқда жойлашган, аҳолиси 30 000 га яқин бўлган Вангаратта шаҳридаги сайлов округи офиси ташқарисида содир бўлганини айтди.

Полис маълумотларига кўра, у Мерфи стритдаги офис ташқарисида маҳаллий вақт билан соат 15:35 атрофида (Буюк Британия вақти билан 05:35) уриб кетилган.

ABC телеканалининг 7.30 дастурига берилган тўғридан-тўғри эфирдаги интервьюда Албанизга австралиялик сиёсатчилар ўзлари дуч келаётган таҳдидлар ва хавф-хатарлар ҳақида ўзаро гаплашадиларми, деган савол берилганда, у йиғлаб юборишига сал қолди.

"Ҳа", деди у ва қўшимча қилди: "Ҳозирги вақтда менинг хавотирим ҳамкасбларимдан бири ҳақида".

Кейинчалик у Австралияда "ҳароратнинг кўтарилиши" ҳамда "бақир-чақирнинг ҳаддан ташқари кўпайиб, соғлом мулоқотнинг етишмаётгани" ҳақида гапирди.

Матбуот анжуманида Австралия Ички ишлар вазири Тони Берк қонун чиқарувчиларга нисбатан таъқиб қилиш ва таҳдид солиш ҳолатлари бўйича мурожаатлар 2025-26 молия йилида ўтган йилдаги 951 тага нисбатан ортганини айтди.

Матбуот анжуманида Хейнсга ҳурмат бажо келтирар экан, Албаниз уни "фантастик даражада меҳнаткаш" деб атади.

"У жуда ақлли, лекин энг муҳими, у шунчаки ҳалол, ҳақиқий пок инсон ва бутун парламент ҳамда у билан мулоқотда бўлган ҳар бир киши томонидан ҳурмат қилинади", дея қўшимча қилди у.

Унинг айтишича, бу ҳужум унинг жамоаси учун "ишониб бўлмайдиган шок" бўлади.

Австралия Ташқи ишлар вазири Пенни Вонг ушбу ҳодисани "ҳайратда соладиган ва жуда ташвишли ҳужум" деб атади.

Виктория штати Премьери Бен Кэрролл ушбу "шафқатсиз ҳужум"дан "қаттиқ ғазабда" эканини айтди.

Австралия мухолифати етакчиси Ангус Тейлор ҳужумдан "чуқур қайғуда ва ташвишда" эканини билдирди.

"Бу миллатимиз учун мудҳиш кун", деди у. "Ҳеч ким бу каби нишонга олинмаслиги керак."