Австралиянинг энг кекса "David Jones" универмаги 188 йилдан кейин касодга учради
Тармоқ фаолияти қабул қилувчи бошқарувчилар томонидан ўрганиб чиқилаётган бир вақтда, бренднинг 38 та жисмоний дўкони ва онлайн сайтлари ўз ишини давом эттиради.
Австралиянинг энг кекса универмаги David Jones 188 йилдан кейин банкротликка учради
Австралиянинг энг кекса универмаги бўлмиш David Jones ихтиёрий администрация (банкротлик) тартибига ўтди.
Мамлакатдаги энг кекса универмаглар тармоғи бўлган David Jones ихтиёрий администрация тартибига ўтди ва бунинг оқибатида минглаб иш ўринлари хавф остида қолди.
Ушбу қадам харидорлар анъанавий дўконлардан онлайн харидларга ўта бошлагани сабабли, маҳаллий аҳоли орасида DJs номи билан танилган 188 йиллик ритейлернинг бир неча йиллик молиявий қийинчиликларидан сўнг ташланди.
McGrathNicol ихтиёрий администраторларига кўра, FTI Consulting қабул қилувчи ташкилоти компанияни ўрганаётган бир пайтда David Jones’нинг жисмоний ва онлайн дўконлари ўз фаолиятини давом эттиради.
"David Jones афсонавий компания ҳисобланади ва жуда кўп австралияликларнинг DJ's дўконларига ташриф буюргани ҳақида хотиралари ва тарихи бор", деди бош ижрочи директор Эрика Бертольд ва бренд "бизнесни келажак учун қайта йўлга қўйиш" бўйича "яхши пухта ишланган режа"га эга эканини қўшимча қилди.
Бертольд, шунингдек, "мижозларга, жамоамиз аъзоларига ва ҳамкорларимизга ушбу даврда David Jones’ни доимий қўллаб-қувватлаб турганликлари учун" миннатдорчилик билдирди.
David Jones’да 6000 га яқин ходим ишлайди ва у 38 та жисмоний дўконга эга, жумладан 17 таси Westfield савдо марказларида жойлашган.
Бошқарув кенгаши администрация тартибига ўтишга қарор қилишидан бир неча соат олдин, Westfield эгаси бўлмиш Scentre компанияси ритейлер октябрь ойи учун ижара ҳақини тўламаганини ва "шу сабабли ижара шартномасини бузганини" маълум қилди.
"Ҳозирги чакана савдо муҳити, ўсиб бораётган харажатлар, катта ва эскирган савдо майдонлари ҳамда таъминот занжиридаги муаммолар ушбу ҳолатга олиб келганини тушунамиз", деди FTI Consulting қабул қилувчи ташкилотидан Кристофер Хилл.
Хиллнинг таъкидлашича, администраторлар ва қабул қилувчиларни тайинлаш David Jones’га "нафас ростлаб олиш" ва бизнесни қайта ташкил этиш имкониятини беради.
Кўпчилик австралияликлар учун David Jones ва унинг фирма белгиси бўлмиш қора ва оқ рангли "қарға оёғи" (houndstooth) нақши ҳашамат тимсоли эди.
Бироқ унинг инқирози универмаг модели учун "ўлим қўнғироғи" бўлди, деди Маккуори университети Бизнес мактабида маркетингдан дарс берувчи Яна Боуден.
"Бир пайтлар у Австралиядаги ҳашаматли харидларнинг энг юқори чўққиси — Harrods’нинг австралияча шакли эди", деди у, "ҳашамат ва жозибани кўриш, унинг бир қисмига айланиш, барча премиум классдаги ҳашаматли брендлардан ҳайратланиш ва ўзингизни муваффақиятга эришгандай ҳис қилиш учун борадиган жой эди".
Сидней марказидаги бош дўконга ташриф буюриш, айниқса, байрамона Рождество витриналарини томоша қилиш кўплаб австралиялик оилалар учун анъана эди.
"Одамлар шунчаки ўша витриналарни кўриш ва сеҳрни ҳис қилиш учун шаҳардан бир неча соатлик узоқликдаги жойлардан келишарди", деди Боуден, аммо сўнгги йилларда бренд ўз жозибасини йўқотди.
"Шаҳар марказидаги дўконлар ўзларининг юқори табақага хос салобатини сақлаб қолган, аммо шаҳар атрофидаги дўконлар жуда ҳафсалани пир қилади – улар оддий, ҳаяжондан холи ва уларда ҳеч қандай ҳашамат қолмаган", деди у.