Австралиялик қотил қамоқхонада Вегемайт ейиш ҳуқуқидан маҳрум бўлди
Кўчмас мулк бўйича тадбиркорни ўлдирган Андре МакКечни Австралия маданиятидан баҳраманд бўлиш унинг ҳуқуқи эканини таъкидлади.
**Австралиялик қотил қамоқхонада Vegemite ейиш ҳуқуқини қўлга кирита олмади**
Австралияда умрбод қамоқ жазосини ўтаётган маҳкум қотил маҳбусларга миллий рамзга айланган аччиқ-шўр дрожжили паста — Vegemite ейишни тақиқловчи қоидани бекор қилишга бўлган уринишда мағлубиятга учради.
Андре Маккечнининг таъкидлашича, 2006 йилдан бери амалда бўлган ушбу тақиқ уни "австралиялик сифатида ўз маданиятидан баҳраманд бўлиш" ҳуқуқидан маҳрум қилган.
Виктория штати расмийларининг билдиришича, маҳбуслар ушбу ўткир ҳидли пастадан панжара ортида контрабанда моддаларини яшириш ёки спиртли ичимликлар тайёрлашда фойдаланиши мумкин.
Дўшанба куни Олий суд судьяси Маккечнининг шикоятини рад этиб, маҳбуснинг "маданий ҳуқуқлари, биринчи навбатда, унинг озодликдан маҳрум қилиш жазосига ҳукм қилингани факти билан чекланганини" айтди.
Штат қамоқхоналарини бошқарадиган Виктория Адлия ва жазони ижро этиш департаментига қарши очган даъвосида 54 ёшли Маккечни пастага қўйилган тақиқ қамоқхоналарни маҳбусларнинг саломатлиги ва фаровонлигини сақлашга имкон берадиган озиқ-овқат билан таъминлашни талаб қилувчи қонунларни бузишини важ қилиб кўрсатган эди, аммо судья бу ҳолат ўз исботини топмаганини билдирди.
Маккечни 1990-йилларда Квинслендда кўчмас мулк бўйича тадбиркорни пичоқлаб ўлдиргани учун умрбод қамоқ жазосига ҳукм қилинган. У Викторияга кўчирилишдан олдин ушбу жазонинг бир қисмини Квинслендда ўтаган.
Суд мажлисида Виктория жазони ижро этиш хизмати томонидан тақдим этилган далиллар тингланди. унга кўра, Vegemite ҳиди қамоқхонага олиб кирилаётган гиёҳванд моддаларни аниқлашга уринаётган қидирув итларини чалғитиши мумкин.
Ушбу маҳсулот Квинсленд, Жанубий Австралия ва Тасмания қамоқхоналарида ҳам тақиқланган.
Баъзилар учун Vegemite севимли нонушта маҳсулоти ҳисобланади, аммо у 1923 йилда Австралия дўконлари расталарида илк бор пайдо бўлганидан бери баҳсли шуҳратга ҳам эга бўлган.
Ушбу тўқ жигарранг паста бир асрдан кўпроқ вақт олдин Виктория штати маркази Мельбурнда Британиянинг Marmite пастасига муқобил сифатида яратилган.
Ўтган йилнинг апрель ойида Канададаги австралиялик кафе эгасига ушбу зиравор маҳаллий соғлиқни сақлаш қоидаларига жавоб бермагани учун уни расталардан олиб ташлаш айтилганида, бу халқаро баҳсга сабаб бўлган эди.
Австралия Бош вазири Энтони Албаниз баҳсга аралашиб, Канаданинг Vegemite’нинг "бемани" рақиби бўлмиш Marmite маҳсулотини сотишга рухсат берганини "анча эриш" ҳолат деб атади. Кейинчалик кафе эгасига ушбу пастани сотишни давом эттиришга рухсат берилди.