Австралия серияли қотилни қамоқдан озод этмоқчи
Австралия серияли қотилни қамоқдан озод этмоқчи
Австралия суди 11 кишининг ўлдирилиши бўйича судланган серияли қотиллардан бирини қамоқдан шартли равишда озод қилиш мумкинлиги ҳақида қарор чиқарди.
Қурбонлар етти йил давомида ўлдирилган, уларнинг аксариятининг жасади 1999-йилда Сноутаун шаҳрида кислота солинган бочкалардан топилган. Шу боис жиноятлар “Бочкалардаги жасадлар” номи билан машҳур бўлган. Ушбу воқеалар ҳамда 2003-йилда якунланган бир йиллик суд жараёни кўплаб китобларга ва 2011-йилда суратга олинган “Сноутаун” филмига асос бўлган.
Мазкур иш бўйича судланган уч қотил орасида энг ёши Жеймс Влассакис ҳисобланади. У жиноятларини 1998-йилда, 18 ёшида бошлаган. Влассакис тўрт кишини ўлдирганини тан олган. У умрбод қамоқ жазосига ҳукм қилиниб, камида 26 йил қамоқда ўташи белгиланган эди. Бу муддат 2025-йил августида тугаган.
Влассакис аввал декабр ойида шартли равишда озод қилинган, бироқ штат ҳукумати бу қарорга эътироз билдириб, уни бекор қилдиришга эришган. Шунга қарамай, Жанубий Австралия Апелляция судининг уч нафар судяси шартли озодлик ҳақидаги дастлабки қарорни ўз кучида қолдирди.
Шартли озод қилиш кенгаши раиси Френсис Нелсоннинг айтишича, Влассакис қилган ишларидан пушаймон. Бундан ташқари, унга антисоциал шахсият бузилиши ташхиси қўйилмаган ва қамоқдаги хулқ-атвори “аъло” деб баҳоланган.
Жанубий Австралия бош прокурори Кям Маҳер эса бу қарорга қарши чиққан. У жиноятларнинг ниҳоятда оғирлиги ва жабрланувчиларнинг яқинларига етказилган руҳий жароҳат Влассакисни қамоқда сақлашни оқлашини таъкидлаган.