Австралиялик машҳур болалар ёзувчиси болаларни эксплуатация қилиш билан боғлиқ жиноятларда айбланиб, қамалди
«Jasper Jones» ва «Runt» асарлари муаллифи полиция бир неча ой олдин унинг уйида тинтув ўтказганидан сўнг, май ойида ўз айбига иқрор бўлди.
Машҳур австралиялик болалар ёзувчиси болаларни эксплуатация қилиш билан боғлиқ жиноятлар учун қамалди
Австралиялик болалар ёзувчиси Крейг Силви болаларни эксплуатация қилиш материалларини сақлагани ва тарқатгани учун етти ойлик қамоқ жазосига ҳукм қилинди.
Ҳукмни ўқиб эшиттирар экан, судья Ҳейли Корманн Силвининг хатти-ҳаракатларини «жирканч» ва «қадр-қимматни камситувчи» деб таърифлади.
Силви январь ойида полиция унинг Ғарбий Австралиядаги уйида тинтув ўтказиб, бир нечта электрон қурилмаларни мусодара қилганидан кейин ҳибсга олинган эди. Май ойида 44 ёшли ёзувчи болаларни эксплуатация қилиш материалларини сақлаш ва тарқатишда айбига иқрор бўлди, октябрь ойида эса ҳукм чиқарилишини кутиш жараёнида қамоққа олинди.
WA Today хабарига кўра, душанба куни Корманн: «Сиз минглаб одамларнинг ишончини поймол қилдингиз ва хоинлик қилдингиз, бутун жамиятни умидсизликка солингиз», деди.
Полициянинг маълум қилишича, расмийлар уйни тинтув қилиш учун келишганида, Силвининг компьютерида болаларни эксплуатация қилиш бўйича онлайн чатлар очиқ турган бўлган.
Судда эшитилишича, ушбу чатларда Силви ўзини «ҳаддан ташқари очиқ кўнгил» ва «тақиқланган нарсаларга муккасидан кетган» деб таърифлаган.
У порнография сайтининг бошқа фойдаланувчиси билан 5 ёшгача бўлган болаларга нисбатан жинсий қизиқишини муҳокама қилган, детективлар эса унинг қурилмаларида бошқа катталарнинг болаларни ҳақорат қилаётгани акс этган тасвирлар ва видеоларни топган.
Дастлаб унга тўртта жиноят бўйича айблов қўйилган эди, аммо кейинчалик прокурорлар улардан иккитасини қайтариб олишди.
Прокурорларнинг таъкидлашича, Силви тасвирлардаги болаларни жабрланувчига айлантирган «жабр-зулм цикли»ни авж олдиришга ёрдам берган ва қатиқ жазо зарурлигини таъкидлаган.
Бироқ ёзувчининг ҳимоячиси унда «болаларга нисбатан жинсий қизиқиш» бўлмаганини ва у «эмоционал» ўз-зига озор бериш шакли сифатида «энг тубан материаллар»ни қидирганини айтди.
«Унинг хатти-ҳаракатлари руҳий ҳаяжондан вақтинчалик халос бўлишни таъминлаган», деди Элоиз Баркер.
Унинг айтишича, Силви қилмишидан чин дилдан пушаймон бўлган, унинг жамоатчиликдаги мавқеи ва бунинг ортидан оммавий ахборот воситаларининг эътибори — бу унинг собиқ шериги ва болаларининг бошқа штатга кўчиб ўтишига олиб келди — аллақачон ўз-ўзидан жазо бўлган.
Судья Корманн бу важларнинг кўпчилигини рад этди ва Силвининг жинояти жуда оғир эканини айтди.
The Australian нашрининг хабар беришича, у: «Бу болалар, бу турдаги жиноятларнинг жабрланувчилари ҳақиқий ва руҳий жароҳат олишган... бундай суиистеъмолликларнинг улар учун оқибатлари узоқ муддатли ва жуда ва жуда азоблидир», деди.
Силви етти ойлик қамоқ жазосига ҳукм қилинди ва бу муддат 22 октябрдан ҳисобланади. У шартли равишда озод қилиниш (парол) ҳуқуқига эга.
Силвининг балоғат ёшига етиш ҳақидаги «Жаспер Жонс» романи ярим миллиондан ортиқ нусхада сотилган ва 2010 йилда мамлакатнинг бош нашриёт органи томонидан «Йил китоби» мукофотини қўлга киритган.
Ғарбий Австралияда бўлиб ўтадиган ва икки ўсмир ўғил бачага қаратилган роман, шунингдек, Дублин Халқаро Адабий Мукофоти ва Майлз Франклин Адабий Мукофотига даъвогарлар рўйхатига киритилган.
Кейинчалик у 2017 йилда Тони Коллетт ва Хюго Уивинг иштирокидаги фильмга ва саҳна асарига мослаштирилган.
Унинг яна бир эътиборли асарларидан бири — 2022 йилда чоп этилган «Рант» романи бўлиб, у Австралия чеккасидаги 11 ёшли қиз ва унинг дайди итининг саргузаштлари ҳақида ҳикоя қилади. У, шунингдек, 2024 йилда Селест Барбер иштирокида фильм қилиб суратга олинган.
У ҳибсга олинганидан бери нашриётлар ва китоб дўконлари унинг асарларини пештахталардан олиб ташлашди, айрим штатлардаги мактаблар эса Жаспернинг китобларини ўқув дастурларидан чиқариб ташлашди.