Австралиядаги илк Мишлен юлдузлари бир штатдаги 11 та ресторанга берилди
Барча жойлар Жанубий Австралияда жойлашган бўлиб, Аделаида ва унинг атрофидаги виночилик ҳудудларини қамраб олади.
Австралия ўзининг илк Мишлен юлдузларини қўлга киритди, Жанубий Австралиядаги 11 та ресторан гиднинг мамлакатдаги дебют танловида ушбу шарафга сазовор бўлди.
Аделаидадаги Magill Estate Restaurant иккита юлдуз билан тақдирланган ягона маскан бўлди, қолган 10 таси эса биттадан юлдуз олди.
ABC миллий телерадиокомпаниясига кўра, Жанубий Австралия ҳукумати инспекторларнинг штат бўйлаб хуфиёна саёҳатини молиялаштирган, бу эса нима учун мамлакатнинг бошқа ҳудудларидаги масканлар рўйхатга киритилмаганини тушунтиради.
Ушбу эълон Мишлен гиди Францияда илк бор нашр этилганидан 100 йилдан кўпроқ вақт ўтгач ва уни Австралияга олиб келиш бўйича кўп йиллик муваффақиятсиз уринишлардан сўнг янгради.
Сўнгги 10 йил давомида Мишлен Миллий туризм кенгаши билан гидни мамлакатга жорий этиш бўйича бир неча бор музокаралар олиб борган, аммо бу суҳбатлар келишувга олиб келмаган эди.
Жанубий Австралия мустақил ҳаракат қилиш ва ўз битимини тузишни маъқул кўрди. Штат ҳукумати тўланган суммани ошкор этмади, аммо Туризм вазири Эмили Берк телерадиокомпанияга берган интервьюсида ушбу харажатларни ёқлади.
"Бу бизга туристик йўналиш яратиш ва ўзимизни дунё харитасига киритиш имконини бермоқда", деди у.
Бу қарор Мишленнинг Янги Зеландияга кенгайиши ортидан қабул қилинди. Янги Зеландия гидга киритилгани учун уч йил давомида 6,3 миллион Янги Зеландия доллари (2,7 миллион фунт стерлинг; 3,5 миллион доллар) тўлашга рози бўлиб, шул йилнинг июль ойида Океанияда бу гиддан жой олган биринчи йўналишга айланган эди.
1900 йилда ака-ука Андре ва Эдуард Мишленлар томонидан асос солинган гид дастлаб ҳайдовчиларни саёҳат қилишга ундаш, пировардида уларнинг асосий шина сотиш бизнесини қўллаб-қувватлашга қаратилган эди. У ресторан мукофотлари соҳасида энг танилган номлардан бирига айланишидан олдин ҳайдовчиларга хариталар ҳамда овқатланиш ва яшаш жойлари бўйича тавсиялар бериб келган.
Мишлен юлдузлари 1926 йилда жорий этилган ва шундан бери бутун дунё бўйлаб ошпазлар ва ресторанлар учун энг нуфузли мукофотга айланган.
Битта юлдуз юқори сифатли таом тайёрланишини, иккита юлдуз йўлни бурса арзийдиган аъло даражадаги таомларни, учта юлдуз эса махсус саёҳатга арзийдиган фавқулодда пазандачилик санъатини англатади.
Битта юлдуз соҳиблари орасида очиқ оловда таом тайёрлашга ихтисослашган Норвуддаги Arkhé ресторани бўлса, Аделаидадаги Aptos Австралиянинг маҳаллий маҳсулотларига асосланган дегустация менюсини таклиф этади.
Кенгроқ гидда Жанубий Австралиянинг 70 дан ортиқ бошқа ресторанлари ҳам ўрин олган бўлиб, улар орасида "Биб Гоурманд" категориясида эътироф этилганлар ҳам бор. Бу категория ҳамёнбоп нархларда яхши таомларни тақдим этадиган ресторанларни ажратиб кўрсатади.