“Мижозларимиз – бутун дунёдан келган ҳожилар” - Мадинада ўзбек ресторани очган ватандош
Муқаддас Мадина шаҳрида фаолият бошлаган ўзбек ресторани – Маҳмоод Кебаб ўзбекистонлик зиёратчиларга хизмат кўрсатиш билан бирга, дунёнинг турли нуқталаридан келган ҳожиларга ўзбек таомлари ва меҳмондўстлигини тарғиб қилмоқда. Ресторан асосчиси Нодир Маҳмуд аввалига АҚШда бизнес бошлашни режалаштиргани, аммо тақдир уни Саудияга бошлаб келгани ва у ерда тадбиркор бўлишнинг ўзига хосликлари ҳақида Kun.uzъга сўзлаб берди.
Яқин вақтгача хорижда бизнес бошлаган ватандошларимиз ҳақида эшитганимизда, бу ноёб ҳодиса сифатида қабул қилиниб, ҳайратга сабаб бўларди. Ўзбекистоннинг дунёга очилиши билан чет элларга саёҳат қилувчилар ҳам, хорижий мамлакатларда доимий яшаб, тадбиркорлик фаолиятини бошлаган ватандошларимиз сони ҳам ортиб бормоқда.
Саудия Арабистони деганда кўз олдимизга аввало муқаддас Макка ва Мадина шаҳарлари, ҳаж ва умра зиёрати учун келган миллионлаб мусулмонлар келади. Сўнгги йилларда ватандошларимизнинг ҳаж ва умра зиёратларига боришлари кескин кўпайди. Табиийки, улар учун ушбу шаҳарлардаги сервис, хизмат кўрсатиш ва овқатланиш каби кундалик эҳтиёжлар ҳам муҳим аҳамият касб этмоқда.
Ватандошларимизнинг Ватанидан узоқда ҳам ўз уйидагидек таомланишини таъминлаш, шунингдек, хориждан келган сайёҳларга ўзбек таомлари ва меҳмондўстлигини танитиш мақсадида муқаддас Ҳарам ҳудудида илк ўзбек ресторани – "Маҳмоод Кебаб"ни очган Нодир Маҳмуд билан учрашдик. Уни илк ўзбек ресторани дейишимизнинг асосли сабаби бор: ватандошимизнинг таъкидлашича, бу айнан Ҳарам ҳудудида 100 фоиз ўзбек инвестицияси билан очилган биринчи ўзбек таомлари ресторанидир.
**"АҚШда очмоқчи эдик, ризқимиз Мадинада экан"**
– Ресторан бизнесига кириб келишимнинг тарихи болаликка бориб тақалади. Кўпчилик ота-оналар қатори бизнинг ҳам отамиз "болам бекор юрмасин, бирор ҳунарни ўргансин" деган мақсадда уйимиз яқинидаги умумий овқатланиш шохобчасига – ошпазга шогирдликка берди. Аста-секин шу йўлда юриб, бу ҳунарнинг сир-асрорларини ўрганиб, катта бўлдик. Ризқимиз шу соҳадан экан, шунда барака топдик.
Ёшликдан дунёга чиқишни ният қилганмиз. Дунё таниган катта брендларга ҳавас қилиб, шундай брендни яратиб, ўзимиз ҳам ресторанлар тармоғини кўплаб хорижий шаҳарларда очсам, деб ният қилардим.
Илк савдо нуқтамизни АҚШда очмоқчи бўлдик. У ерга бориб, паст-баландини ўрганишимиз жараёнида бизга яқин танишимиз Мадина вариантини айтиб қолди. Келдик. Кўрдик. Ўргандик. Ва ризқимиз қўшилган экан, шу ерда ресторан очдик. Ҳа, бу катта таваккал эди. Лекин бизнесда таваккал қилмаса бўлмайди.
**"Саудияда бизнес юритишда асосийси сабр керак..."**
– Аллоҳга шукур, ҳозирча ҳаммаси яхши кетяпти. Ишни бошлаш осон бўлмаган. Ҳужжатбозликлар, юридик ташвишлар, югур-югурлар анча вақтни олди.
Мадина пойтахт бўлмагани, сокинроқ, асосан ибодат ва зиёрат учун келувчилар шаҳри бўлгани сабаб, бу ерда ишлар секинроқ битади. Ҳужжатлаштириш ишлари 6-7 ой вақт олди. Ҳар бир бизнесда қийинчилик бўлади, лекин уни енгиб ўта олмаган бизнесмен – бизнесмен эмас. Саудияда бизнес бошлашда вақт, билим ва энг асосийси, сабр керак.
**"Ресторанимиз доим гавжум"**
– Ресторанимизга дунёнинг турли мамлакатларидан минглаб хўрандалар киришади. Улар таомларимиз ва меҳмондўстлигимиздан таъсирланиб, бошқаларга ҳам тавсия қилишади. Доим гавжум.
Гоҳида айрим хорижликлар таомланиш асносидаёқ Ўзбекистон ҳақида интернетдан ўрганиб, шу ернинг ўзида ўтириб, интернетдан юртимизга чипта олган пайтлари бўлган. Шуларни кўриб илҳомланамиз, ғурур туямиз ва куч-ғайрат оламиз.
Мақсадимиз – муқаддас шаҳарга келган ҳожиларга, зиёратчиларга хизмат қилиш, уларнинг ҳожатини чиқариш. Қолаверса, Ўзбекистон номини ўз йўналишимиз орқали дунёга янада кенгроқ ёйиш, юртимизни танитиш.