Австралияда турист сумкасини ўмарган ўғрини қувгани ортидан 6 йилга қамалди

Австралияда туристнинг сумкасини ўғирлаган шахсни қувиб, унинг ўлимига сабаб бўлган сингапурлик 29 ёшли Линколн Нг Жинг Каи 6 йилга қамалди. У ижара машинасидан сумкасини ўғирлаган одамни қувиб етиб, уни босиб кетган. Ғарбий Австралия Олий суди 2-ноябр куни уни 5 йил-у 9 ой муддатга озодликдан маҳрум қилди.

Каи аввалига қасддан одам ўлдиришда айбланган эди. Кейин прокурорлар айбловни эҳтиёцизлик оқибатида одам ўлдириш моддасига ўзгартирди. Судланувчи айбига иқрор бўлди. Жазони ўташ муддати 2024-йил 24-майдан ҳисобланади. У 3 йил-у 9 ойдан кейин муддатидан олдин шартли озод қилиниши мумкин.

Воқеа 2024-йил май ойида Перт шаҳрида юз берган. Каи севгилиси ва унинг оиласи билан дам олиш учун келган эди. Ўша куни улар ресторан яқинида ижара машинасини қолдирган. Машинанинг юкхонасида паспорт, иПад, нақд пул ва Аппле АирТаг қурилмаси бўлган сумка бор эди. Марк Жон Бёрнс исмли шахс машинанинг орқа ойнасини синдириб, сумкани олиб кетган.

Эртаси куни оила АирТаг орқали сумканинг жойлашувини аниқлаб, полицияга қўнғироқ қилган. Шу пайтда Бёрнс электровелосипедда сумкани кўтариб кетаётган эди. Севгилисининг отаси Каига ўғрининг ортидан тушишни айтган. Улар ўғрини 10 дақиқа давомида қувиб борган.

Бёрнс майсазорга чиққанида, машинадагилардан бири велосипедни бироз туртишни сўраган. Каи орқа ғилдиракка урилган ва Бёрнс йиқилган. Йиқилган шахс таҳдид қила бошлагач, Каи қўрқиб кетган. У машинани орқага оламан деб, адашиб газни босиб юборган.

Натижада машина Бёрнсни уриб, уни 25 метрга судраб борган. Гувоҳлар бақиргач, Каи машинани орқага олиб, жабрланувчини қутқарган ва полицияни кутган. Бироқ Бёрнс касалхонада вафот этган.

Судя Каининг бу ҳаракатини ўзбошимчалик ва ўзича жазолашга уриниш деб баҳолади. Аммо у Каининг афсусини, илгари судланмаганини ва ваҳимага тушганини инобатга олди. Шунга қарамай, судя хавфли вазиятни айнан Каининг ўзи машинада қувиш орқали юзага келтирганини таъкидлади.