Августда йил бошидан бери энг кам бензин импорт қилинди
Августда йил бошидан бери энг кам бензин импорт қилинди
Ўзбекистон 2026-йил август ойида 16,1 минг тонна бензин импорт қилди.
Таҳлилларга кўра, бензин импорти йил бошидан буён кескин камайиб бормоқда. Жумладан, январда хориждан 125,9 минг тонна, февралда 153,3 минг тонна бензин харид қилинган. Март ойида бу кўрсаткич 149 минг тоннани, апрелда эса 140,5 минг тонна ёқилғини ташкил этган. Кейин май ойида импорт ҳажми 72 минг тоннага, июнда 50,7 минг тоннага, июлда эса 27,2 минг тоннага тушган.
Шу билан бирга, жорий йилнинг умумий импорт ҳажми 2025-йилдаги кўрсаткичлардан сезиларли даражада юқори экани кўринади. Хусусан, 2026-йил январ-август ойларида жами қиймати 437,4 миллион долларлик 721,45 минг тонна бензин импорт қилинган. Бу кўрсаткич 2025-йилнинг мос даврида 294,3 миллион долларга тенг 511 минг тоннани ташкил этган. Яъни, бу йил ўтган йилга нисбатан қарийб 210 минг тонна кўпроқ бензин сотиб олинган.
Бир тонна импорт бензиннинг нархи 2025-йилнинг саккиз ойида ўртача 575,9 доллар бўлган бўлса, жорий йилда 606,2 долларгача ошган.
Таққослаш учун, 10-сентябр куни Республика товар-хомашё биржасида бир тонна бензин 13,3 миллион сўмдан ёки 1132 доллардан сотилди.