“Арсенал”нинг келажаги дея эътироф этилган футболчи қандай қилиб наркокурьерга айланди?

“Арсенал”нинг келажаги деб кўрилган футболчи қандай қилиб наркокурьерга айланди?

Бир вақтлар “Арсенал”нинг бўлажак юлдузи сифатида тилга олинган Жей Эммануел-Томас фаолиятини Англия қуйи лигаларида давом эттиришга мажбур бўлди. 2024-йилда эса унинг ҳаётида бундан ҳам оғирроқ бурилиш юз берди. Футболчи Таиланддан Буюк Британияга 600 минг фунт стерлинглик гиёҳванд моддаларни олиб кириш схемасида қатнашгани учун қўлга олинди.

Бир йил ўтиб, Эммануел-Томас айбини тан олди ва тўрт йилга озодликдан маҳрум этилди. Шу тариқа унинг футболчилик фаолияти ҳам деярли якунига етди.

“Арсенал”нинг катта умиди

Лондонда туғилган Эммануел-Томас саккиз ёшида “Арсенал” академиясига қўшилган. У клубнинг иқтидорли футболчилардан иборат авлодидаги энг истиқболли номзодлардан бири эди.

Бўйи, кучи ва техникаси билан ажралиб турган футболчи фаолиятининг илк босқичида деярли барча позицияларда синаб кўрилди. Мураббийлар уни марказий ҳимоячи ёки ҳужумчи сифатида кўрган бўлса, Арсен Венгер унинг ҳужумдаги салоҳияти юқорироқ эканини таъкидлаган.

Эммануел-Томас 16 ёшидаёқ “Арсенал”нинг 18 ёшгача бўлган жамоасига сардор этиб тайинланди. 2008/2009-йилги мавсумда эса жамоаси билан ёшлар ўртасидаги Англия Кубоги финалида “Ливерпул”га қарши майдонга тушди. Ўша таркибда Жек Уилшир, Франсис Коклен, Анри Лансбери ва Эммануел Фримпонг каби футболчилар ҳам бор эди.

2010-йил январида, 19 ёшида Эммануел-Томас Арсен Венгер бощилигидаги асосий жамоада дебют қилди. У Англия Кубогидаги “Сток Сити”га қарши учрашувда Тео Уолкотт, Сеск Фабрегас, Сол Кемпбелл ва Микаел Силвестр билан бирга асосий таркибда майдонга тушди.

Ўша йилнинг октябрида “Челси”га қарши ўйинда ҳам қатнашган Эммануел-Томас кейинчалик “Нюкасл”га қарши Лига Кубоги баҳсида захирадан тушди. Ўйиндан сўнг Венгер ёш футболчининг имкониятларини юқори баҳолади.

“Жей менинг эшигимни қаттиқ тақиллатмоқда. Унда катта салоҳият бор. Жисмоний имкониятлари ҳам жуда яхши. Қанчалик юқори даражага чиқиши эса ўзига боғлиқ. Чунки унинг имкониятлари жуда катта”, деганди Венгер.

Бироқ бу умидлар ўзини оқламади. Футболчи “Арсенал” сафида яна атиги икки марта майдонга тушди (“Шахтёр”га қарши Чемпионлар Лигаси ва “Уиган”га қарши Англия Кубоги). Шундан кейин у “Арсенал”да бошқа ўйин ўтказмади.

“Арсенал”дан кетиш

Жисмоний имкониятларига қарамай, Эммануел-Томас техник хатолари сабаб асосий таркибда ўз ўрнини топа олмади. Футболчининг ўзи ҳам Лондонда фаолиятини давом эттириш қийинлигини англаб етган эди.

“Бир пайт келиб, асосий таркибдаги футболчиларга қарайсиз. Ўз позициянгизда сиздан олдинда турган ўйинчиларни кўриб, уларга етиш учун қанчалик кўп ишлашингиз кераклигини тушунасиз”, деган у.

2011-йилда Эммануел-Томас “Арсенал”ни тарк этди. Унгача ҳужумчи “Блекпул” ва “Кардифф”да ижара асосида ўйнаган, бироқ бу жамоаларда ҳам ўзини тўлиқ кўрсата олмаган. Кейинги йилларда у “Ипсвич”, “Бристол Сити”, “Куинз Парк Рейнжерс”, “МК Донс” ва “Жиллингем” каби клубларда тўп сурди. “Бристол Сити”даги фаолияти унинг энг яхши даврларидан бири бўлди (15 та гол).

“У биринчи даражали футболчи. Унинг нафақат мухлисларни хурсанд қиладиган техникаси, балки меҳнацеварлиги ҳам бор”, деган эди “Бристол Сити”нинг ўша пайтдаги бош мураббийи Стив Коттерилл.

Эммануел-Томас “Бристол Сити” сафида 100 дан ортиқ учрашувда майдонга тушди. Аммо унинг фаолияти барибир кўнгилдагидек кечмади.

Таиланддаги қисқа саргузашт

2019-йилда Эммануел-Томас фаолиятини Таиландда давом эттиришга қарор қилди ва “Раёнг” клубига ўтди. Футболчи янги ҳаётидан мамнунлигини айтган. Бироқ клуб молиявий муаммолар сабаб мавсум ўрталарида фаолиятини тўхтатди ва Эммануел-Томас жамоани тарк этишга мажбур бўлди. Кейинчалик у Шотландиянинг “Ливингстон” клубига қўшилди. Бу ерда ҳам футболчи айрим учрашувларда юқори даражадаги техникасини намойиш этди.

“Техник жиҳатдан Жей мен кўрган энг яхши футболчилардан бири. Унинг тўп билан муомаласи, назорати ва қобилияти ҳайратланарли”, деган “Ливингстон” бош мураббийи Девид Мартиндейл.

Аммо яна ўша муаммо — Эммануел-Томас ўз имкониятларини узоқ муддат давомида намойиш эта олмади. Кейинчалик у “Абердин” сафида ҳам ўйнади. Бироқ атиги 14 та учрашувдан сўнг клубни тарк этди. Шундан кейин Ҳиндистонда ҳам қисқа муддат фаолият юритди.

Қамоқ

Бир пайтлар Премьер Лигада юлдуз бўлиши кутилган Эммануел-Томас энди Шотландиянинг қуйи дивизионида ҳафтасига 600 фунт ишлаб, ўртача 1 800 мухлис қаршисида тўп тепарди.

2024-йил сентябрида эса унинг ҳаёти бутунлай ўзгарди. Эммануел-Томас Таиландга икки аёл учун сафар уюштирган ва харажатларини қоплаган. Аёлларга бунинг учун 2 500 фунт тўланиши ҳам ваъда қилинган.

Улар Лондоннинг Станстед аеропортига қайтганида, божхона ходимлари юкларини текширди. Натижада чамадонлардан вакуум қадоқланган 60 килограмм наша топилди. Гиёҳванд моддаларнинг умумий қиймати тахминан 600 минг фунтга баҳоланди.

Аёллар дастлаб юкларда олтин бор деб ўйлаганини айтди. Телефонлардаги ёзишмалар ҳам уларнинг бу гапини қисман тасдиқлади. Шу сабабли уларга қўйилган айбловлар кейинчалик бекор қилинди. Эммануел-Томас эса кўп ўтмай Шотландиянинг Гринок шаҳрида қўлга олинди.

Судда футболчи Таиланддаги наша етказиб берувчилар билан Буюк Британиядаги харидорлар ўртасида воситачилик қилгани ва аёлларга наркотикларни олиб келишни ташкил қилгани айтилди. У бу иш учун 5 минг фунт олиши керак бўлган. Дастлаб айбини рад этган Эммануел-Томас 2025-йил май ойида айбини тан олди. Унинг адвокати футболчи узоқ вақт давомида клуб топа олмагани сабаб жиддий молиявий қийинчиликларга дуч келганини айтди. Адвокатнинг сўзларига кўра, Эммануел-Томас “васвасага берилиб”, жиноятга қўл урган.

Суд футболчининг қилган ишини “катта хато” деб баҳолади. 2025-йил июн ойида Эммануел-Томас тўрт йилга озодликдан маҳрум этилди.

“Энди ўз ҳаракатларингиз сабаб профессионал футболчи сифатида эмас, жиноятчи сифатида таниласиз”, деди судя Александр Миллс.

Қамоқдан кейинги ҳаёт

Эммануел-Томас жазони тўлиқ ўтамасдан, тергов вақтида қамоқда ўтказган кунлари ҳисобга олиниб, 2025-йил июлида озодликка чиқарилди. У электрон билагузук таққан ҳолда яшаши ва белгиланган вақтда уйида бўлиши керак эди.

Шунга қарамай, футболчи қисқа вақт ичида яна майдонга қайтди. У Англиянинг қуйи лигаси вакили “Тоттон” билан шартнома имзолади. Кўп ўтмай “Брейнтри Таун” сафига ўтди. Эммануел-Томас янги жамоасидаги дебютида ҳам ўзининг техник имкониятларини намойиш этди. У жарима зарбасидан чиройли гол уриб, жамоасига 2:0 ҳисобидаги ғалабани тақдим этди.

“У аввалгидек тез эмас, аммо барибир сифатли футболчи. Бу даражада ундан яхшироқ жарима зарбасини кўриш қийин”, деди “Брейнтри Таун” бош мураббийи Стив Питт.

Кейинчалик Эммануел-Томас собиқ Англия терма жамоаси футболчилари Майка Ридс ва Дениел Старриж ташкил қилган лигада ҳам тўп тепди. У олти кишилик футбол турнирининг сўнгги мавсумида жамоасининг энг яхши тўпурарларидан бирига айланди. 35 ёшли футболчи ҳозирда яна бир собиқ футболчи ва судланган Найл Рейнжерга қарши рингга чиқиши кутилмоқда. Жанг 2026-йил октабр ойида ўтказилиши режалаштирилган.

Бир вақтлар “Арсенал”нинг келажаги сифатида кўрилган ва Арсен Венгер катта умид боғлаган Жей Эммануел-Томаснинг фаолияти эса бутунлай бошқа томонга бурилди. Унга бир неча бор имконият берилди, аммо футболчи улардан тўлиқ фойдалана олмади. Охир-оқибат эса жиноятга қўл уриб, футболчилик фаолиятини ҳам хавф остига қўйди.