Арнолд Шварсенеггер Санта Клаус ролида: “Қопли одам” номли жангари комедия филмнинг трейлери намойиш этилди (видео)
Филм премьерасига бир ой қолди.
Арнолд Шварсенеггер Санта Клаус сифатида: “Қопли одам” жангари комедиясининг трейлери чиқди (видео)
Амазон МГМ Студиос “Қопли одам” номли Рождество комедиявий жангари филмининг илк трейлерини тақдим этди. Унда бош ролни Арнолд Шварсенеггер ижро этади ва у филмда Санта Клаус қиёфасида намоён бўлади. Унинг ёнида эса “Жек Ричер” сериали билан танилган Алан Ричсон бўлади.
Сюжетга кўра, шўх элф сеҳрли қопни ўғирлаб кетади ва шу билан бутун Рождество байрамини хавф остига қўяди. Йўқолган қопни қайтариб олиш учун Санта Клаус Венс исмли ўғридан ёрдам сўрайди. Бу образни Алан Ричсон гавдалантирган. Венс қизи, Санта Клаус ва омадсизлар жамоаси билан бирга ҳаётидаги энг катта ўғриликни амалга ошириши ва байрамни сақлаб қолиши керак.
Бу Арнолд Шварсенеггернинг 30 йилдан кейин Рождество мавзусидаги филмга қайтишидир. Актёр 1996-йилда “Рождество совғаси” оилавий комедиясида бош ролни ўйнаган. Унда унинг қаҳрамони ўғлига машҳур ўйинчоқни топиб бериш учун бор кучи билан ҳаракат қилади. Аммо бу ўйинчоқ аллақачон барча дўконларда сотилиб бўлган бўлади. Энди эса актёр Санта Клауснинг ўзини ижро этади.
Филмда Аквафина, Кен Жеонг, Жейн Краковски, Лайза Коши, Кайл Муни ҳамда Майкл Сирил Крейтон ҳам рол ўйнаган.
Филм режиссёри — Адам Шенкман, ссенарий муаллифи эса Аллан Райс. “Қопли одам” филмининг премьераси 2-декабр куни Приме Видео платформасида бўлиб ўтади.