Аризани “тинчитиш”га $500 000 – Бухорода товламачилик қилган 72 ёшли шахс 8 йилга қамалди
Тошкент шаҳрида яшовчи нуроний бухоролик тадбиркорга қўнғироқ қилиб, ўзини “Президент администрацияси масъул ходими” сифатида таништирган. Сўнгра администрация томонидан унинг фаолияти бўйича текшириш ўтказиш топшириғи берилганини айтиб, қўрқитган. Шундан сўнг “аризани тинчитиш” учун 500 минг доллар сўраган.
Аризани “тинчитиш” учун $500 000 сўраган — Бухорода товламачилик қилган 72 ёшли эркак 8 йилга озодликдан маҳрум этилди
Бухоролик тадбиркорга нисбатан товламачилик содир этган шахс жиноий жавобгарликка тортилди.
Суд ҳукмига кўра, Тошкент шаҳрида яшовчи 72 ёшли H.Yu. Бухоро шаҳридаги МЧЖлардан бирининг раҳбарига ўзини “Президент администрацияси масъул ходими” деб таништирган.
H.Yu. тадбиркорга администрация томонидан у раҳбарлик қилаётган жамият фаолияти юзасидан текширув ўтказиш топшириғи берилганини, жамиятга ажратилган кредит маблағлари мақсадсиз сарфлангани ҳақида маълумотлар борлигини айтиб, уни қўрқитган. Текширув якунида барча мол-мулкидан маҳрум бўлиши мумкинлигини билдирган.
Кейин ишни “ёпди-ёпди” қилишини айтиб, тадбиркордан 500 минг доллар талаб қилган. “Хамир учидан патир” сифатида банк картасига 10 млн сўм ўтказдириб олаётган пайтда тезкор тадбирда ушланган.
H.Yu. судда айбини тан олмаган ва тадбиркордан ярим млн доллар сўрамаганини билдирган.
“2025-йил октабр ойида ижтимоий тармоқлар орқали бир МЧЖ раҳбарининг телефон рақамини топиб олдим. Сўнг ушбу жамият бош ҳисобчиси E.ning ҳам телефон рақамини топиб, унга қўнғироқ қилдим ва Президент администрациясида ишлашимни, жамият раҳбари менга қўнғироқ қилишини айтдим.
Шу куни жамият раҳбари менга қўнғироқ қилди. Унга администрацияда ишлашимни, жамият устидан шикоят тушганини, шу сабабли ўзим Бухорога бориб, учрашишимни билдирдим.
2 кундан сўнг Бухоро шаҳрига бордим. Когондаги темир йўл бекатида мени МЧЖ раҳбари кутиб олди. У билан Бухоро шаҳридаги офисига бордик. Суҳбат давомида уларга МЧЖ фаолияти бўйича администрацияга мурожаат келиб тушганини, 40 млн доллар кредит олиб, текширув давомида йўқ нарсани кўрсатганини, завод ҳозирги кунда фаолият юритмаётганини айтдим ҳамда ҳужжатлардаги камчиликларни тўғрилаб қўйишларини билдирдим.
Шу вақтда ёнимга жамият бош ҳисобчиси ва юристи келди. Улар мендан Президент администрацияси масъул ходимлигимни тасдиқлайдиган ҳужжат сўрашди. Шундан сўнг МЧЖ раҳбари шахсимга оид маълумотларни ёзиб олди ва темир йўл вокзалига олиб бориб қўйди.”
Шу тариқа, H.Yu. Тошкент шаҳрига қайтиб келган. Бир неча кундан сўнг унга МЧЖ раҳбари қўнғироқ қилган.