Аргентиналик эр-хотин нацистлар томонидан талон-торож қилинган картинани қонуний эгасига қайтаради
Сўнгги барокко даврига мансуб «Аёл портрети» асари Буэнос-Айрес яқинида сотиладиган уйнинг фотосуратларида пайдо бўлгунига қадар 80 йил давомида йўқолган деб ҳисобланган.
Аргентиналик эр-хотин нацистлар томонидан талон-торож қилинган суратни қонуний эгасига қайтаради
Нацистлар томонидан ўғирланган ва ўтган йили Аргентинада топилган сурат энди унинг қонуний эгасининг ворисига топширилиши керак, деб қарор қилди суд.
Сўнгги барокко даврига мансуб *«Аёл портрети»* Буэнос-Айрес яқинида сотиладиган уйнинг фотосуратларида аниқлангунга қадар 80 йил давомида бедарак йўқолган деб ҳисобланган.
Ушбу уй Иккинчи жаҳон урушидан кейин ўша ерга қочиб кетган нацист қочоқнинг қизи Патрисия Кадгиенга тегишли бўлган ва у энди суратни расмийлардан яширгани учун жиноий жавобгарликдан қутулиб қолиш эвазига уни қайтаришга рози бўлди.
*«Аёл портрети»* 1940 йилда нацистлар Нидерландияга бостириб кирганидан кейин яҳудий санъат дилери Жак Гудстиккер коллекциясидан талон-торож қилинган 1000 дан ортиқ санъат асарларидан бири эди.
Аргентинанинг «Clarin» газетаси хабарига кўра, унинг келини ва ягона вориси Марей фон Саҳер ушбу муаммога эътибор қаратиш мақсадида суратни Буэнос-Айресдаги Холокост музейида вақтинчалик намойиш этишни режалаштирмоқда.
Фон Саҳер бундан аввал ўз оиласи «Жакнинг коллекциясидан ўғирланган ҳар бир санъат асарини қайтаришни ва унинг меросини тиклашни мақсад қилганини» айтган эди.
Сурат илк бор 2025 йил август ойида Нидерландиянинг «Algemeen Dagblad» (AD) газетаси томонидан Мар-дел-Плата соҳилбўйи шаҳридаги кўчмас мулк агентлигининг веб-сайтида аниқланган.
У отаси Фридрих Кадгиен Адольф Гитлернинг ўринбосари Герман Герингнинг катта маслаҳатчиси бўлган Патрисия Кадгиеннинг меҳмонхонасидаги яшил диван тепасида осиғлиқ турган эди. Геринг бутун Европа бўйлаб минглаб санъат асарларини талон-торож қилган.
Патрисия Кадгиен ва унинг турмуш ўртоғи Хуан Карлос Кортегосо жума куни Буэнос-Айрес яқинидаги судда адвокатлари билан бирга ҳозир бўлишди
Ўтган йилнинг сентябрь ойида Патрисия Кадгиен ва унинг турмуш ўртоғига нисбатан жиноий тил бириктириб яшириш айблови қўйилган ва уйида ўтказилган тинтувда дастлаб сурат топилмаганидан кейин улар уй қамоғига олинган эди.
Бироқ жума куни Мар-дел-Платада бўлиб ўтган суд мажлисида эр-хотинга нисбатан барча жиноий ишлар тўхтатилди.
Оилалар ва прокурорлар ўртасида эришилган келишувга кўра, Кадгиен ва унинг турмуш ўртоғи санъат асарига бўлган барча ҳуқуқларидан воз кечади ва маҳаллий шифохоналарга 4,8 миллион песо (2 356 фунт стерлинг; 3 185 доллар) хайрия қилиши керак бўлади.
*«Коллеони графиняси»* номи билан ҳам машҳур бўлган *«Аёл портрети»* сўнгги барокко даври рассоми Жузеппе Гисландига тегишли деб ҳисобланади.
Бироқ, экспертлар санъат асарининг келиб чиқишини шубҳа остига олишган, баъзи олимлар уни ўша даврнинг бошқа бир италиялик рассоми Жовани Батиста Серутига нисбат беришган.