Аргентина президент Милейга нисбатан криптофирибгарлик бўйича суриштирувни тўхтатди
Хавьер Милей криптовалюта ҳақидаги ижтимоий тармоқдаги постни ўчириб ташлаганидан сўнг унинг қиймати кескин тушиб кетганида, фирибгарлик қилганини рад этди.
Аргентина Криптофирибгарлик бўйича Президент Милейга қарши суриштирувни тўхтатди
Аргентина президенти Хавьер Милей ва унинг синглисининг криптовалюта можаросига алоқадорлиги бўйича жиноий суриштирув бекор қилинди.
Суд ҳужжатларига кўра, федерал судья Марсело Мартинес де Жоржи прокурорларнинг илтимосига биноан Милей ва унинг синглиси Карина Милейга қарши ишни ёпган.
Аргентина президенти 2025 йил февраль ойида ижтимоий тармоқдаги постида тилга олганидан сўнг тезда касодга учраган янги ишга туширилган $Libra криптотангасини тарғиб қилганини инкор этган эди.
У криптовалюта қиймати ошиб, сўнг кескин тушиб кетгани ва инвесторларнинг аксариятини катта зарар билан қолдирганида «халоллик билан» ҳаракат қилганини айтган. Милей ишнинг ёпилгани ҳақидаги хабарга ҳозирча изоҳ бергани йўқ.
Ишни бекор қилишда судья «хабар қилинган воқеалар ҳуқуқий категорияга тушмайди» деди ва ҳеч қандай «жиноий жиҳатдан аҳамиятли алдов» исботланмагани ҳақида қарор чиқарди.
Фирибгарлик ҳақидаги айбловлар Милей илгари Твиттер номи билан танилган X тармоғида $Libra тангаси ҳақида пост жойлаштириб, ўша пайтда бу кичик бизнес ва стартапларни молиялаштиришга ёрдам беришини айтганидан кейин пайдо бўлди.
Аргентина президенти уни сотиб олиш ҳаволасини улашганидан сўнг криптовалюта нархи кескин кўтарилди.
Бироқ бир неча соат ичида у постни ўчириб ташлади ва крипто қиймати пасайиб, инвесторлар пулининг катта қисмини йўққа чиқарди.
Ушбу воқеа мухолифат қонунчиларини импичмент жараёнини тайёрлашга ундади, интернетдаги баъзи фойдаланувчилар эса Милейни «rug pull» (гиламни тортиб олиш) — криптовалюта тарғиботчилари харидорларни жалб қилиб, кейин савдони тўхтатиб ва сотувдан тушган пуллар билан ғойиб бўладиган схемада айбладилар.
Шундай бўлса-да, Аргентина президенти маҳаллий Todo Noticias медиасига берган интервьюсида: «Мен уни тарғиб қилмадим, шунчаки улашдим», деб таъкидлади.
Президент офиси Милейнинг $Libra'ни яратишга ҳеч қандай алоқаси йўқлигини ва Коррупцияга қарши курашиш офиси президент ножўя ҳаракат қилган-қилмаганини ҳал қилишини эълон қилди.
Милей, шунингдек, ўз постини ўчириб ташлаганини ҳимоя қилиб, ўша пайтда «лойиҳанинг тафсилотларини билмагани ва бу ҳақда билиб олгач, уни тарғиб қилишни давом эттирмасликка қарор қилганини» айтди.
Телеинтервьюда эса у $Libra'га сармоя киритганлар буни «ихтиёрий равишда» қилганини ва хавф-хатарлардан хабардор бўлишганини таъкидлади.