Бразилия президентга ҳақорат сабаб Аргентинадаги элчисини ортга чақириб олди

**Бразилия Аргентина элчисини чақириб олди: Президентга қилинган ҳақорат сабаб бўлди**

Бразилия Аргентина президенти Хавер Милейнинг Бразилия президенти Луис Инасио Лула да Силвани ҳақорат қилиши ортидан Аргентинадаги элчисини ортга чақириб олди. Бу ҳақда Деуцче Велле хабар берди.

Бразилия Ташқи ишлар вазирлиги баёнотида шундай дейилади: "Хорижий мамлакат президентининг ўзга давлат ҳудудида унинг раҳбарини, суд тизими билан бирга барча демократик институтларини ҳамда халқини ҳақорат қилгани тарихда кузатилмаган".

АФП агентлиги манбасига кўра, Бразилия ушбу ҳақоратлар юзасидан тушунтириш бериши учун Аргентинанинг мамлакатдаги элчисини ҳам чақиртирган.

**Милейнинг сўзлари**

Аргентина раҳбари 25-июл куни Бразилиянинг Сан-Паулу шаҳрига ташриф буюрди ва собиқ президент Жаир Болсонаронинг ўғли Флавио Болсонаро ташкиллаштирган сиёсий тадбирда қатнашди. Кичик Болсонаро бўлажак сайловда Лула да Силвага қарши номзодини қўймоқчи.

Милей тадбирдаги нутқида Бразилиянинг амалдаги чап қанот президентини номини ошкор қилмаган ҳолда "судланган", "жиноятчи" ва "ўғри" деб атади. Бундан ташқари, у Бразилия Олий суди судяси Александр де Мораесни ҳам исмини айтмасдан "кал чиқинди" дея ҳақорат қилди.

Бразилия Олий федерал суди президенти, вазир Эдсон Фачин Милейнинг бу гапларини мамлакат Олий суди судясига нисбатан Бразилия тупроғида қилинган ҳурмацизлик деб баҳолади.

**Аргентина сиёсатчиларининг муносабати**

Аргентинанинг собиқ президенти Алберто Фернандес Х тармоғида Милейнинг ҳақоратлари акс этган видеони жойлади. У шундай ёзди: "Милей Бразилияга бориб, ақли расо бўлмаган одамдай бақирди. У қамоқдаги давлат тўнтариши ташкилотчиси билан учрашишни талаб қилди. Қардош ва асосий савдо ҳамкоримиз бўлган мамлакат президентини ҳақорат қилиш кечирилмас ҳолатдир".

Буенос-Айрес провинсияси губернатори ҳамда бўлажак президентлик сайловларининг эҳтимолий номзоди Аксел Кисиллоф ҳам тармоқда ўз муносабатини билдирди. У 26-июл куни Бразилия ташқи ишлар вазири Мауро Виейра билан боғланганини ва Милей Аргентина халқининг қарашларини акс эттирмаслигини етказганини айтди.

Кисиллоф таъкидлади: "Президент Милейнинг Бразилия ҳукумати, унинг президенти ва бутун халқини ҳақорат қилганини чуқур уят ҳисси билан кузатдим. Буенос-Айрес провинсияси номидан шуни айтаманки, Аргентина қардош халқларни ҳурмат қилади ва минтақавий интеграцияни қўллаб-қувватлайди".

Аввалроқ Лула да Силвага эрта босқичдаги тери саратони ташхиси қўйилгани, сиёсатчи профилактик нурланиш муолажаларини бошлагани ҳақида хабар берилганди.