АҚШлик ўсмир Ҳиндулар ибодатхонасида отишма содир этишни режалаштирганликда айбланиб, суд олдида жавоб берди

**АҚШлик ўсмир ҳиндулар ибодатхонасида отишма содир этишни режалаштирганликда айбланиб суд олдида жавоб берди**

Чикаго яқинидаги ҳиндулар ибодатхонасига оммавий отишма билан таҳдид қилингани бўйича олиб борилган суриштирувдан сўнг бир эркак ҳибсга олинди.

Иллинойс штатининг Палатин шаҳрида яшовчи 19 ёшли Александрос Папоракис чоршанба куни суд олдида жавоб берди. Би-би-сининг АҚШдаги ҳамкори CBS хабарига кўра, унга нисбатан террорчилик таҳдидини содир этиш ва мосламасининг стволи 16 дюймдан калта бўлган милтиқни ноқонуний сақлаш моддалари бўйича айблов эълон қилинган.

Ички ишлар ходимларининг маълум қилишича, полиция Папоракис ўзини оқ танлиларнинг устунлиги тарафдори деб таърифлаган ва оқ танли бўлмаган одамларга нисбатан нафрати ҳақида ёзган манифестни аниқлаган.

CBS хабарига кўра, прокурорлар айбланувчи ҳамкасбига телефон орқали қуроли тиқилиб қолганини айтганини ва AR услубидаги милтиқ тасвирланган хабарларни юборганини билдирган.

Прокурорларнинг сўзларига кўра, бошқа хабарларда у тепкини босганда қуролдан ўқ чиқмагани акс этган видео, шунингдек, ўзининг тактик жилет кийиб тушган фотосурати бўлган.

Ушбу ҳамкасби ва Папоракис ишлаган Taco Bell ресторанидаги яна бир ходим якшанба куни полицияга мурожаат қилиб, ҳодиса ҳақида хабар берган.

Палатин полиция бошлиғи Уильям Норднинг айтишича, зобитлар Папоракиснинг уйида тинтув ўтказиш чоғида «милтиқ, ўқланган магазинлар, юзлаб милтиқ патронлари ва зирҳли жилетни мусодара қилишган».

Полиция ва ФҚБ ходимлари, шунингдек, Папоракиснинг электрон қурилмалари ва электрон ёзишмаларини ҳам текшириб чиқдилар ва у ерда манифестни топганликларини айтишди.

CBS хабарига кўра, Норд: «Манифестни ўқиб чиқиб, у баъзи экстремистик идеологияларни баён этганини ва зўравонлик ҳақида гапирганини, оммавий қотилликлар ва ушбу оммавий отишмани қандай амалга оширишни хоҳлагани ҳақида ёзганини кўрдик», деди.

Прокурорларнинг таъкидлашича, Папоракиснинг ҳамкасби полицияга айбланувчи ишда оқ танлилар устунлиги тарафдори экани ҳақида гапиргани ва бошқа миллат вакиллари шаънига ҳақоратли сўзлар айтганини маълум қилган.

Прокурорларнинг билдиришича, шанба куни Папоракис ишчилардан бирига Аврорадаги ҳиндулар ибодатхонасида «буни» режалаштираётганини ва якшанба «махсус кун бўлишини» айтган, эртаси куни эса ҳамкасбига қўнғироқ қилиб, хабарлар юборган.

Полициянинг маълум қилишича, таҳдидларда назарда тутилган аниқ жой ҳали тасдиқланмаган ва тергов давом этмоқда.

Маҳаллий конгрессмен Раджа Кришнамоорти ушбу ҳодисадан «даҳшатга тушганини» айтди. Фейсбукда эълон қилинган баёнотида у шундай деди: «Ҳар бир америкалик қўрқувсиз яшашга ва ибодат қилишга ҳақли ва биз нафратнинг барча кўринишларига қарши биргаликда курашишимиз керак».