АҚШда йўлдаги безорилик оқибатида қотиллик содир этган шахсга нисбатан чиқарилган ҳукм судда жабрланувчининг СИ (сунъий интеллект) орқали яратилган видеоси кўрсатилгани сабабли бекор қилинди
Аризона апелляция суди вафот этган қурбоннинг СИ (сунъий интеллект) орқали яратилган мурожаатини эфирга узатиш "ўша чегарадан чиқиб кетгани" ҳақида қарор чиқарди.
Аризона штатида йўлдаги жанжал ортидан қотиллик содир этган шахсга нисбатан жазо чораси қайта кўриб чиқилади. Бунга апелляция суди томонидан суд залида ҳалок бўлган жабрланувчининг сунъий интеллект (СИ) ёрдамида яратилган видеомурожаати ноўрин намойиш этилган деб топилгани сабаб бўлди.
Габриэль Пауль Оркаситас 2021 йилда светофорнинг қизил чироғида юз берган тўқнашув пайтида 37 ёшли Кристофер Пелкини отиб ўлдирганликда айбдор деб топилган эди. У 10 йиллик қамоқ жазосига ҳукм қилинганди.
Унинг ҳимоячилари ўтган йилги ҳукм ўқилишидан олдин суд залида Пелкининг оиласи томонидан СИ ёрдамида яратилган видеонинг намойиш этилишига раислик қилувчи судья йўл қўймаслиги керак эди, дея апелляция берди.
Аризона апелляция суди бу фикрга қўшилди ва 55 ёшли Оркаситасга нисбатан жазо чораси қайта кўриб чиқилиши кераклигини билдирди, чунки СИ орқали яратилган видеоролик «чегарадан чиқиб кетган».
«Бирор воқеани ҳужжатлаштириш ёки муайян лаҳзани ёзиб олиш ўрнига, СИ видеоси жабрланувчининг синглиси тасаввурлари асосида яратилган жабрланувчининг қиёфаси ва унинг фикрларини тақдим этади», деб ёзди апелляция суди чоршанба куни.
Пелкининг синглиси Стейси Уэльс ўтган йили BBC’га берган интервьюсида оила аъзолари СИ видеоси учун унинг қиёфасини қайта тиклаш мақсадида овоз ёзувлари, видео ва фотосуратлардан фойдаланганини айтган эди.
«Мени отиб ўлдирган одам — Габриэль Оркаситасга айтадиганим: ўша куни шундай вазиятда тўқнаш келганимиз афсусланарли», деган эди Пелкининг СИ талқини 2025 йилда суд залида. «Бошқа ҳаётда, эҳтимол, дўст бўлишимиз мумкин эди».
«Мен кечиримлиликка ва кечирувчи Худога ишонаман. Ҳамиша ишонганман ва ҳозир ҳам ишонаман», дея давом этган бошига кулранг бейсболка кийган Пелкининг СИ талқини.
Ҳукм чиқариш вақтида иш бўйича судья Тодд Лэнг СИдан фойдаланишни олқишлаган эди.
«Менга ушбу СИ видеоси жуда маъқул келди, бунинг учун раҳмат. Сиз қанчалик ғазабда бўлманг, оиланинг ғазаби қанчалик асосли бўлманг, мен кечиримлиликни эшитдим», деган эди судья Лэнг. «Бу самимий бўлганини ҳис қиляпман».