АҚШда ноқонуний равишда юк машинаси ҳайдовчиси бўлиб ишлаган икки Ўзбекистон фуқароси қўлга олинди
Американинг Нью-Жерси штатида АҚШ Иммиграция ва божхона хизмати (ICE) ходимлари мамлакатда ноқонуний равишда бўлиб турган, аммо шу билан бирга йирик юк машиналарини бошқариш учун тижорат ҳайдовчилик гувоҳномасига эга бўлган икки нафар Ўзбекистон фуқаросини қўлга олди.
Қўлга олишлар тижорат ҳайдовчилик гувоҳномаларини беришдаги фирибгарлик ва қоидабузарликларни аниқлаш бўйича умуммиллий кенг кўламли кампания доирасида амалга оширилди.
Идора хабарига кўра, 37 ёшли Зоҳид Заҳидов 23 август куни Вудбрижда, 30 ёшли Хайрулло Пайзуллаев эса Гамильтонда қўлга олинган. Ҳозирда иккаласи ҳам ICE ҳибсхонасида сақланмоқда ва депортация қилинишини кутмоқда.
Америка идораси маълумотларига кўра, Заҳидов Нью-Йоркда берилган тижорат транспортини бошқариш бўйича ўқувчилик гувоҳномасига эга бўлган. 15 май куни у маст ҳолатда машина бошқарганликда айбдор деб топилган. Бундан ташқари, унга тан жароҳати етказиш мақсадида ҳужум қилиш ва таъқиб қилиш айбловлари қўйилган.
Иккинчи қўлга олинган шахс, Пайзуллаев, Пенсильваниядан ташқарида берилган тижорат ҳайдовчилик гувоҳномасига эга бўлган. 21 июль куни АҚШ Адлия вазирлигининг иммиграция судьяси уни ҳибсга олиш ҳақида қарор чиқарган.
ICE вакилларининг маълум қилишича, ушбу ҳибсга олишлар АҚШ Ички хавфсизлик вазирлигининг фирибгарлик ва тижорат ҳайдовчилик гувоҳномаларини ноқонуний олишга қарши курашиш бўйича умуммиллий кампаниясининг бир қисмидир.
Аввалроқ Тошкентга Швеция ва Польша миграция қонунчилигини бузган 27 нафар депортация қилинган Ўзбекистон фуқароси бўлган чартер рейси етиб келган эди.