АҚШда «Крокус»даги терактга алоқадор бўлган афғон жангарисига ҳукм чиқарилди
АҚШда «Крокус»даги терактга алоқадор деб кўрилаётган афғон жангарисига ҳукм эълон қилинди
Афғон жангариси Муҳаммад Шарифулла «Исломий давлат» (ИД) террорчилик ташкилотининг Афғонистондаги бўлинмаси — «Вилояти Хуросон» фаолиятида иштирок этгани учун АҚШда 20 йилга озодликдан маҳрум этилди. Америка расмийлари, шунингдек, уни 2024 йилда Москва вилоятидаги «Крокус Сити Холл»да содир этилган террорчилик ҳужумини ташкил этишда иштирок этган деб даъво қилган.
Ҳукм 16 сентябрь куни чиқарилди. АҚШ Адлия вазирлиги хабарига кўра, у хорижий террорчилик ташкилотига моддий ёрдам кўрсатиш бўйича кўп йиллик фаолиятда иштирок этганликда айбдор деб топилган.
Тергов маълумотларига кўра, «Крокус Сити Холл»га ҳужумга тайёргарлик кўриш ва уни амалга ошириш даврида Шарифулла ҳужумчиларга Калашников автоматлари ва бошқа қуроллардан фойдаланиш бўйича кўрсатмалар берган. Бундан ташқари, у ҳужум пайтида улар билан алоқада бўлиб турган.
2025 йил март ойида АҚШ Адлия вазирлиги Шарифулла ФҚБ (ФБР) сўроқ пайтида «Вилояти Хуросон» номидан Москва вилоятидаги концерт залига ҳужум қилганларга кўрсатма берганини тан олгани ҳақида хабар берган эди.
Америка расмийларининг фикрига кўра, Шарифулла террорчилик ташкилоти билан деярли ўн йил давомида алоқадор бўлган. 2016 йилдан 2025 йилда ҳибсга олингунига қадар у ўндан ортиқ ҳужумларда қатнашган ва турли вазифаларни бажарган: разведка олиб борган, худкуш-жангарилар ва қурол-яроғларни ташиган, гуруҳ аъзолари ўртасида хабарларни етказган ва тарғибот материалларини тайёрлаш билан шуғулланган.
АҚШда у таъқиб қилинган эпизодлардан бири 2021 йил август ойида Кобул аэропорти яқинидаги ҳужум бўлди. АҚШ Адлия вазирлиги маълумотларига кўра, Шарифуллага аэропортга олиб борадиган йўналишда назорат-ўтказиш пунктлари бор-йўқлигини текшириш топширилган. У йўл бўш эканлигини маълум қилганидан сўнг, Abbey Gate дарвозаси яқинида портлаш содир бўлган.
Ушбу ҳужум оқибатида 13 нафар америкалик ҳарбий хизматчи ва 160 дан ортиқ тинч аҳоли ҳалок бўлган.
Шарифулла 2025 йилда Афғонистон-Покистон чегараси ҳудудида қўлга олиниб, кейин АҚШга олиб кетилган. АҚШ Оқ уйи аввалроқ у сўроқ пайтида Кобулдаги ҳужумга алоқадорлигини тан олгани, шунингдек, Россия ва Эрондаги бошқа ҳужумлар ҳақида гапириб берганини маълум қилган эди.
«Крокус Сити Холл»даги теракт иши бўйича якуний ҳукмни Ғарбий округ ҳарбий суди 2026 йил 12 мартда чиқарди. 15 нафар судланувчи умрбод қамоқ жазосига ҳукм қилинди. Улар орасида тўрт нафар бевосита ижрочи — Шамсидин Фаридуни, Далержон Мирзоев, Муҳаммадсобир Файзов ва Саидакрами Рачабализода, шунингдек, 11 нафар шериклар гуруҳи бор эди. Улардан бири, умрбод озодликдан маҳрум этилган Яқубжон Юсуфзода кейинчалик Москвадаги тергов изоляторида ўз жонига қасд қилди.