АҚШда дизель ёқилғиси нархи тарихий энг юқори даражага етди
Февраль ойи охирида Эрон можароси бошланганидан бери, улгуржи нефть нархларининг кескин кўтарилишига мос равишда, ёқилғи нархлари ҳам шиддат билан ўсди.
АҚШда дизель ёқилғиси нархи рекорд даражага етди
АҚШ-Исроилнинг Эрон билан уруши америкаликларнинг ҳамёнига зарба беришда давом этар экан, АҚШдаги ҳайдовчилар ёқилғи қуйиш шохобчаларида дизель учун ҳар қачонгидан ҳам кўпроқ пул тўламоқдалар.
Америка автомобиль ассоциацияси (AAA) маълумотларига кўра, АҚШда бир галлон дизель ёқилғисининг ўртача нархи бир йил олдинги ўртача 3,71 доллардан 5,85 долларгача кўтарилди ва Россиянинг Украинага кенг кўламли босқинидан кейинги аввалги энг юқори кўрсаткичдан ҳам ошиб кетди.
Февраль ойи охирида Эрон можароси бошланганидан бери ёқилғи нархи улгуржи нефть нархининг кўтарилиши ортидан кескин ўсди.
Бунга жавобан АҚШ Президенти Дональд Трамп яқинда АҚШ январь ойида бостириб кирган Венесуэла билан нефть келишуви орқали «барча америкаликлар учун бензин нархини сезиларли даражада пасайтиришга» ваъда берди.
Шанба куни эълон қилинган келишув, Венесуэла Муваққат президенти Делси Родригеснинг сўзларига кўра, тасдиқланган захираси 65 миллиард баррелни ташкил этувчи 17 та стратегик нефть конини ўзлаштиришни, шунингдек, Венесуэла учун «100 миллиард доллардан (73,9 миллиард фунт стерлинг) ортиқ инвестиция ва 209 миллиард доллардан ортиқ солиқларни» назарда тутади.
АҚШ расмийси BBC’нинг АҚШдаги ҳамкори CBS News телеканалига маълум қилишича, АҚШ ҳукумати «Венесуэладаги тажрибали хусусий оператор» билан қўшма корхона устидан 55 фоизлик назоратни ўзида сақлаб қолади.
Шунга қарамай, айрим таҳлилчилар бунга шубҳа билан муносабат билдиришди, жумладан, ушбу келишув Венесуэла нефть секторига инвестиция киритилишига тўсқинлик қилиб келаётган узоқ йиллик тўсиқларни бартараф эта олишига шубҳа қилишмоқда.
Нефть автомобиль ёқилғисининг муҳим таркибий қисми бўлиб, Эроннинг урушга бўлган муносабати туфайли етказиб бериш чекланган. Бу эса дунё нефтининг бешдан бир қисми ташиладиган мамлакат жанубидаги тор сув йўли — Ҳурмуз бўғозининг амалда ёпилишига олиб келди.
Ёқилғи қуйиш шохобчаларида нархларнинг кескин кўтарилиши ноябрь ойида бўлиб ўтадиган муҳим оралиқ сайловлар олдидан америкалик сайловчиларнинг ғазабини қўзитди.
Reuters/Ipsos томонидан яқинда ўтказилган сўровномаларга кўра, Трампнинг рейтинг даражаси 33 фоизга тушиб кетган, америкаликларнинг атиги 31 фоизи можарони қўллаб-қувватламоқда.
Бироқ, нархларнинг ошиши барча америкаликлар учун бир хил эмас. AAA маълумотлари шуни кўрсатадики, солиқлардаги фарқлар ва АҚШ нефть ишлаб чиқарувчиларидан узоқлик сабабли Ғарбий штатлардаги одамлар бошқа жойлардагига қараганда анча кўп пул тўлашади.
Масалан, Вашингтонда дизель ёқилғисининг ўртача нархи бир йил олдинги 5,03 долларга нисбатан бир галлон учун 6,81 долларни ташкил этмоқда.
Дизель ёқилғисининг юқори нархлари билан бир қаторда, америкаликлар бензиннинг тарихий даражадаги юқори нархларига ҳам дуч келишмоқда, бунда бир галлон учун ўртача нарх бир йил олдинги 3,20 доллардан 4,15 долларгача кўтарилди.