АҚШда аёллар Трампдан юз ўгирмоқда
Қўшма Штатлар президентининг рейтинги аёл сайловчилар орасида кескин пасайиб кетди. 2024-йилги сайловда уни қўллаб-қувватлаган ҳар тўртинчи америкалик аёл ҳозирда унинг сиёсатидан норози бўлмоқда.
**АҚШда аёллар Трампдан юз ўгирмоқда**
АҚШ президенти 2024-йилги президентлик сайловларида аёл сайловчиларнинг овозлари ҳисобига ғалаба қозонган эди. Аммо 2026-йил 3-ноябрда Конгрессга бўладиган сайловлар арафасида вазият кескин ўзгарди. 2024-йилда Трампга овоз берган ҳар тўртинчи америкалик аёл ҳозир унинг сиёсатидан норози.
Республикачилар партиясининг собиқ коммуникациялар директори Тара Сетмаернинг айтишича, бу сайловларда Демократларга энг кўп аёллар овоз бериши мумкин.
Реутерс/Ипсос сўрови натижалари шуни кўрсатадики, Демократлар аёл сайловчилар орасида Республикачиларни 18 фоизга ортда қолдирмоқда. Таққослаш учун, 2024-йилги президентлик сайловида бу тафовут атиги 8 фоиз эди.
Бундай катта фарқ охирги бор 2018-йилда, Трампнинг биринчи президентлик даврида кузатилган эди. Ўшанда Демократлар оралиқ сайловларда Вакиллар палатаси устидан назоратни қайтариб олган. Бу гал эса оқибатлар президент учун янада оғирроқ бўлиши мумкин. Ҳозир нафақат Вакиллар палатаси, балки Конгресснинг иккинчи палатаси — Сенат устидан назорат ҳам хавф остида турибди.
Беллветҳер Ресеарч тадқиқот институтига кўра, америкалик аёлларнинг деярли учдан икки қисми Трамп жорий этган божлар ва тарифларга қарши. Шунингдек, Оқ уйнинг шарқий қисмида режалаштирилган улкан баллар залининг қурилиши ҳам норозилик уйғотмоқда. Аёл сайловчиларнинг 68 фоизи бу лойиҳага салбий муносабат билдирган.
Трампни қўллаб-қувватлаш ҳатто Республикачиларнинг анъанавий тарафдорлари орасида ҳам пасаймоқда. Маълумотларга кўра, оқ танли аёлларнинг 47 фоизи ҳозирда Республикачилардан кўра демократларни афзал кўрмоқда.
Шу билан бирга, социологлар бу маълумотлар бироз ноаниқ бўлиши мумкинлиги ҳақида огоҳлантирмоқда. Чунки аввал ҳам сўровномаларда жиддий хатолар кузатилган.
Икки йил аввал НБС нашрининг сайлов олдидан ўтказган сўнгги сўровида Трамп аёллар орасида Демократлар партияси номзоди Камала Ҳаррисдан 16 фоизга ортда қолаётгани айтилган эди. Бироқ сайлов куни амалдаги фарқ атиги 8 фоизни ташкил этган. Социолог Френк Лунц (Лунтз Глобал институти) ўтказилаётган сўровлар жамоатчилик фикрига шубҳа билан қарайдиган Трамп тарафдорларини тўлиқ қамраб ололмаслиги мумкинлигидан хавотир билдирди.