АҚШ тўрт ой ичида роботлар ёрдамида Ҳўрмуз бўғозини миналардан яширинча тозалади - ФТ
Ишлар асосан тунда олиб борилган. Феврал ойида АҚШ ва Исроилнинг Эронга қарши уруши бошланганидан сўнг кемалар бўғоздан ўтишга қўрқиб қолган эди. Америка ҳарбийлари айнан шу миналарни қидириб топиб, йўқ қилгани айтилмоқда.
АҚШ тўрт ой давомида роботлар ёрдамида Ҳўрмуз бўғозини яширинча миналардан тозалади — ФТ
АҚШ ҳарбийлари тўрт ой мобайнида Ҳўрмуз бўғозини миналардан тозалаш бўйича махфий операция ўтказган. Бу ишга АҚШ ҳарбий-денгиз кучларининг махсус бўлинмаси ғаввослари, роботлаштирилган катерлар ва ихтисослаштирилган сувости аппаратлари жалб этилган, деб ёзди ФТ.
Амалиёт асосан тунда олиб борилган. Феврал ойида АҚШ ва Исроилнинг Эронга қарши уруши бошланганидан кейин кемалар бўғоздан ўтишдан қўрқиб қолган эди. Америка ҳарбийлари айнан шу миналарни топиб, йўқ қилгани айтилмоқда.
Эрон халқаро сувларда ва Ўмон қирғоқлари яқинида миналар жойлаштирганини даъво қилган эди. Июн ойида Халқаро денгиз ташкилоти асосий кемачилик йўналишларида 80 га яқин мина борлиги ҳақида хабар берган.
Ўтган ҳафта АҚШ президенти Доналд Трамп Америка ҳарбийлари бўғознинг халқаро сувларидаги «барча миналарни» йўқ қилгани ёки олиб ташлаганини маълум қилди. Пентагон бу маълумотни тасдиқлади.
ФТ аниқлашича, ишнинг катта қисмини ғаввосларнинг кичик гуруҳлари бажарган. Сонарлар билан жиҳозланган роботлаштирилган катерлар ва сувости аппаратлари денгиз тубини текширган. Улар мина топгач, ғаввос тушиб, заряд ўрнатган ва ортга қайтган, шундан сўнг мина портлатилган. Миналарни йўқ қилиш учун портловчи моддалар билан жиҳозланган сувости роботларидан ҳам фойдаланилган бўлиши мумкин.
Кема эгалари ва экспертлар АҚШ, катта эҳтимол билан, бўғознинг Ўмон қирғоқлари яқинидаги жанубий қисмини миналардан ҳақиқатан ҳам тозалаган, деб ҳисобламоқда. Америкаликлар ҳозир кемаларни айнан шу йўналиш бўйлаб олиб ўтмоқда. Бироқ мутахассислар бутун Ҳўрмуз бўғозида бошқа мина қолмаганига шубҳа қилмоқда, деб қайд этади ФТ.
Теҳрон ҳам Вашингтон баёнотларини рад этмоқда. Мамлакат ташқи ишлар вазири ўринбосари Козим Ғарибободийнинг айтишича, «бу миналарнинг жойлашувини Эрондан бошқа ҳеч ким билмайди». Эрон ОАВ сўнгги бир ҳафта ичида камида иккита танкер минада портлаганини, ҳарбийлар эса Ўмон қирғоқларига янги миналар ўрнатганини даъво қилди.
Шу билан бирга, денгиз хизматлари можаро бошланганидан бери бирор кема минада портлаганини ҳали тасдиқлагани йўқ. Сунъий йўлдошдан олинган суратлар ҳам Теҳроннинг даъволарини тасдиқламаяпти. Мавжудлиги тасдиқланган ягона минани май ойида бўғозда покистонлик гидрограф аниқлаган эди.
Ҳатто эҳтимолий миналар ҳақидаги хабарларнинг ўзи ҳам кемачиликка сезиларли таъсир кўрсатмоқда. Ҳўрмуз бўғозидан ўтиш учун суғурта нархи урушдан олдинги даражага нисбатан ўн бараваргача ошди. Йирик нефт танкери учун бу тахминан 10 миллион долларга тушиши мумкин.