АҚШ суди Кубанинг собиқ етакчиси Раул Кастрони ҳибсга олиш учун ордер берди
АҚШ суди Кубанинг собиқ етакчиси Раул Кастрони 1996-йилда Флорида бўғози устида икки самолётнинг уриб туширилиши иши бўйича ҳибсга олишга ордер берди. Ҳодиса оқибатида тўрт киши ҳалок бўлган.
АҚШ суди Кубанинг собиқ раҳбари Раул Кастрони ҳибсга олиш учун ордер чиқарди
Судя Ариана Фахардо Оршан 1996-йилда инсонпарварлик ёрдами юкланган иккита самолётнинг йўқ қилиниши билан боғлиқ иш доирасида Кубанинг собиқ етакчиси Раул Кастрони ҳибсга олиш ҳақидаги ордерни имзолади.
«Қутқарувчи биродарлар» нотижорат ташкилотига қарашли иккита енгил моторли Сессна 337 самолёти 1996-йил февралида Флорида бўғози устида Куба Ҳарбий-ҳаво кучлари томонидан уриб туширилган эди. Улар АҚШга етиб олишга уринаётган кубалик қочқинларни қидириш ва қутқариш операциясида қатнашган. Ҳодиса натижасида тўрт киши — уч нафар АҚШ фуқароси ва АҚШда доимий яшаш гувоҳномасига эга бўлган бир нафар Куба фуқароси ҳалок бўлди.
АҚШ талқинига кўра, самолётлар халқаро сувлар устида уриб туширилган. Куба вакиллари эса улар мамлакат ҳаво ҳудудини бузиб кирганини билдирган.
Шу йилнинг 20-май куни АҚШда ҳодиса пайтида мудофаа вазири лавозимида ишлаган Раул Кастро ва яна беш нафар шахсга тўртта қотиллик, иккита ҳаво кемасини йўқ қилиш ҳамда АҚШ фуқароларини ўлдириш мақсадида тил бириктириш бўйича расмий айблов қўйилди.
АҚШ учун ушбу ордернинг амалий аҳамияти Раул Кастрони экстрадиция қилишни талаб этиш ва уни Флоридадаги федерал судга олиб келиш учун процессуал асос яратишдан иборат. АҚШ бош прокурори вазифасини бажарувчи Тодд Бланшнинг айтишича, расмийлар уни мамлакатга келтириш чораларини кўради ва унинг судга «ё ихтиёрий равишда, ё бошқа йўл билан» келишини кутмоқда.
Куба ҳукумати эса АҚШ айбловларини «пасткаш ва шармандали сиёсий провокация» деб атаб, Қўшма Штатлар бундай айбловларни илгари суриш учун на қонуний асосга, на юрисдиксияга эга эканини маълум қилди.