АҚШ Раул Кастронинг набирасига қарши санкциялар жорий этди

АҚШ Рауль Кастронинг набирасига қарши санкциялар жорий этди

Америка Қўшма Штатлари Куба собиқ президенти Рауль Кастронинг набираси Фидель Эрнесто Кастро Калисга нисбатан янги санкциялар эълон қилди. Чекловлар остига, шунингдек, Куба расмийлари билан боғлиқ бешта ташкилот ҳам тушди.

Санкциялар рўйхатига 31 ёшли Кастро Калис киритилди. Америка томонининг таъкидлашича, бунга унинг аллақачон санкциялар остида бўлган Рауль Кастронинг ўғли — Алехандро Кастро Эспин оиласининг вояга етган аъзоси эканлиги асос бўлган. Шу билан бирга, ОАВ хабарларига кўра, Кастро Калиснинг ўзи сиёсий лавозимларни эгалламайди.

Чекловлар давлатга тегишли Banco Exterior de Cuba, никель ва кобальт қазиб олиш билан боғлиқ иккита компания, шунингдек, энергетика секторининг иккита тузилмаси, жумладан, нефть тармоғи учун ускуналар етказиб бериш билан шуғулланувчи Empresa Importadora de Abastecimiento para el Petroleo (Abapet) компаниясига ҳам дахл қилди.

АҚШ Давлат котиби Марко Рубио янги чоралар Куба расмийларини қўллаб-қувватловчи молиявий ва ресурс тузилмаларига қарши қаратилганини маълум қилди. Санкциялар чекловлар остига тушган шахслар ва ташкилотларнинг АҚШ юрисдикциясидаги активларини музлатишни, шунингдек, АҚШ фуқаролари ва компанияларига улар билан операциялар ўтказишни тақиқлашни назарда тутади.

Янги чекловлар Дональд Трамп маъмуриятининг Кубага иқтисодий босимни кучайтириш борасидаги навбатдаги қадами бўлди. Бундан аввал Вашингтон Кастро оиласи аъзолари ва Куба расмийларининг бошқа вакилларига қарши санкциялар жорий этган эди.

Аввалроқ АҚШ Сурияни 1979 йилдан бери ушбу мамлакат киритилган бўлган терроризм ҳомийси бўлган давлатлар рўйхатидан чиқарган эди. Ушбу қарор Дамашқ учун хусусий инвестицияларни жалб қилиш ва жаҳон иқтисодиётига интеграциялашув имкониятларини очади, бироқ АҚШнинг айрим шахслар ва ташкилотларга қарши бир қатор санкциялари сақланиб қолмоқда.