АҚШ суди Давлат департаментига грин-карта лотереяси учун рўйхатдан ўтишни 1 ноябргача очиш мажбуриятини юклади
АҚШ суди Давлат департаментига 1 ноябргача грин-карта лотереясига рўйхатдан ўтишни очиш мажбуриятини юклади
Калифорния Жанубий округи федерал суди АҚШ Давлат департаментига рўйхатдан ўтиш ҳанузгача бошланмаган DV-2027 грин-карта лотереясини ўтказиш мажбуриятини юклади. Муддатлар қайта кўриб чиқилгач, идора аризаларни қабул қилишни 1 ноябрдан кечиктирмасдан очиши, саралаш натижаларини эса 3 декабргача эълон қилиши керак.
14 октябрь куни судья Джинсук Ота томонларнинг илгари белгиланган муддатларни кўчириш ҳақидаги биргаликдаги илтимосномасини қаноатлантирди. АҚШ давлат котиби Марко Рубиога қарши даъвони лотерея ўтказилишига эришаётган Red Eagle Law юридик фирмаси киритган эди. Муддатлар тўғрилангани ҳақида фирманинг ўзи хабар берди.
Дастлаб суд Давлат департаментига рўйхатдан ўтиш саналарини 15 октябргача эълон қилиш, аризалар қабулини 18 октябрдан кечиктирмасдан бошлаш ва уни 30 кун давомида олиб бориш мажбуриятини юклаган эди. Саралаш якунлари 19 ноябргача эълон қилиниши керак эди.
Дональд Трамп администрацияси ушбу қарор устидан шикоят қилиши мумкин. 15 октябрь ҳолатига кўра, Red Eagle Law’нинг Марко Рубиога қарши даъвоси бўйича апелляция берилгани ҳақида тасдиқлар йўқ эди. Дастурнинг расмий веб-сайтида DV-2027 учун рўйхатдан ўтиш ҳам ёпиқлигича қолаётган эди.
Навбатдаги ўйинга рўйхатдан ўтиш 2025 йилнинг кузида бўлиб ўтиши керак эди. Бироқ 5 ноябрь куни АҚШ махсус вакили Кристи Ноэм иштирок этиш тартиби ўзгарганини маълум қилди ва янги саналарни кейинроқ эълон қилишга ваъда берди. Аниқ муддатлар барибир айтилмади.
2026 йилнинг августида Red Eagle Law судга мурожаат қилиб, идорадан лотереяни ўтказишни талаб қилди. Сентябрь ойида судья шошилинч чоралар жорий этишни рад этди, аммо ишни кўриб чиқишни давом эттирди.
Diversity Visa дастури ҳар йили АҚШга нисбатан кам иммигрант келадиган мамлакатлар фуқаролари учун 55 мингтагача иммиграция визаларини тақсимлашни назарда тутади.