АҚШ фуқаролик ҳуқуқлари ҳимоячиси Долорес Уэрта 96 ёшида вафот этди
Уэрта 1960 ва 1970 йилларда фермер хўжалиги ходимларининг ҳуқуқлари учун курашган ҳамда иммиграция ва овоз бериш масалалари бўйича иш олиб боришни давом эттирган эди.
АҚШ фуқаролик ҳуқуқлари ҳимоячиси Долорес Уэрта 96 ёшида вафот этди, деб хабар берди унинг оиласи.
Уэрта 1960 ва 1970 йилларда меҳнаткашлар етакчиси Сесар Чавес билан биргаликда қишлоқ хўжалиги ходимларининг ҳуқуқлари учун курашган ва улар биргаликда Бирлашган қишлоқ хўжалиги ходимлари касаба уюшмасига (UFW) асос солишган.
Уэрта ўз жамғармаси орқали иммиграция ва овоз бериш масалаларига эътибор қаратиб, жамоатчилик фаолиятини давом эттирди.
«Тасаввур қилишингиз мумкин бўлганидек, бу биз учун жуда оғир вақт ва оиламиз учун ушбу буюк йўқотишдан қайғураётган бир пайтда шахсий ҳаётимизга дахл қилмаслигингизни сўраймиз», деди чоршанба куни оила матбуот котиби Эрик Ольвера.
Шу йил бошида Уэрта 1993 йилда вафот этган Чавес уни жинсий алоқага «манипуляция қилгани ва мажбурлаганини», шунингдек, 1960 йилларда бошқа бир ҳолатда унга нисбатан зўравонлик ишлатганини айтган эди.
Унинг бу изоҳлари New York Times газетасида Уэрта ва яна икки аёлнинг айбловлари жой олган суриштирув нашр этилганидан кейин янгради. Аёлларнинг таъкидлашича, Чавес ишчилар ҳаракатига жалб қилинган қизларни жинсий ниятида ўзига ўргатиб олган ва уларга нисбатан жинсий тегажоғлик қилган.
Уэртанинг айтишича, Чавес билан бўлган ушбу икки ҳолат ҳомиладорликка олиб келган ва у буни сир тутишга қарор қилиб, болаларни бошқа оилаларда тарбияланишини уюштирган.
Ўшанда Чавеснинг оиласи баёнот бериб, ушбу хабарлардан «шокда» эканликларини билдирган ва аёлларнинг «ҳақиқатни айтишга журъат этганини» юқори баҳолаган эди.