АҚШ Фаластин етакчисининг Нью-Йоркдаги БМТ йиғилишида иштирок этишига кетма-кет иккинчи йил тўсқинлик қилди

**АҚШ Фаластин етакчисини кетма-кет иккинчи йил Нью-Йоркдаги БМТ йиғилишига киритмади**

АҚШ Фаластин президенти Маҳмуд Аббосга келаси ҳафта Нью-Йоркда бўлиб ўтадиган БМТ Бош Ассамблеясида иштирок этиш учун кириш визасини беришни рад этди, деб хабар берди ББCга икки Фаластин манбаси.

Бу қарор АҚШнинг Фаластин расмийларига нисбатан виза санкцияларини узайтираётгани ҳақидаги баёнотидан кейин қабул қилинди. Баёнотда Аббоснинг исми тилга олинмаган бўлса-да, улар тинчлик жараёни бўйича мажбуриятларни бажармаганликда айбланган.

Санкциялар илк бор ўтган йилнинг август ойида жорий этилган бўлиб, ўшанда 80 нафар Фаластин расмийсига Нью-Йоркдаги БМТнинг йиллик йиғилиши учун виза берилмаган эди.

АҚШ ўз баёнотида Фаластин миллий маъмурияти (ФММ) ва Фаластин озодлик ташкилотини (ФОТ) "терроризмни улуғлаш" ва Исроил-Фаластин можаросини "халқаролаштириш"га уринишда айблади.

Фаластин миллий маъмурияти (ФММ) Осло тинчлик келишувлари асосида ташкил этилган. Кейинчалик Фаластин озодлик ташкилоти (ФОТ) худди шу жараён орқали Исроилни тан олиш ва зўравонликдан воз кечиш эвазига Фаластин халқининг расмий вакили сифатида тан олинган.

Фаластин расмийлари АҚШнинг сўнгги баёнотига ҳали муносабат билдиришмади.

Бироқ, ўтган йилги виза қароридан сўнг, Аббоснинг вакили бу қарор "халқаро ҳуқуқ ва БМТ қароргоҳи тўғрисидаги битимга зид" эканини айтган эди.

БМТ қароргоҳи тўғрисидаги битимга кўра, АҚШ хорижлик дипломатларнинг Нью-Йоркдаги БМТ биносига киришига рухсат бериши шарт. Шунга қарамай, Вашингтон хавфсизлик, экстремизм ва ташқи сиёсат сабабларига кўра виза беришни рад этиши мумкинлигини айтади.

Ўтган йилги Бош Ассамблеяда Аббос етакчилар ва давлат раҳбарларига видеоалоқа орқали мурожаат қилган эди.

Ассамблеянинг барча 193 аъзоси пайшанба куни унга бу йилги йиғилишда ҳам шундай қилишга рухсат берилиш-берилмаслиги бўйича овоз бериши керак.

Фаластин давлати ҳозирда БМТга аъзо 193 давлатнинг қарийб 75 фоизи, жумладан, Буюк Британия, Франция, Канада ва Австралия томонидан тан олинган.

БМТ Хавфсизлик Кенгашининг бешта доимий аъзоси орасида АҚШ Фаластин давлатини тан олмаган ягона давлатдир.

АҚШнинг бу қарори БМТнинг Ғазодаги гуманитар вазият ўтган йилнинг октябрь ойида келишилган сулҳга қарамай оғирлигича қолаётгани, Исроилнинг ҳаво ҳужумлари ва бошқа ҳужумлари аҳоли пунктларига зарба беришда давом этиб, қурбонлар ва вайронагарчиликларга олиб келаётгани ҳамда одамларни уй-жойларини ташлаб кетишга мажбур қилаётгани ҳақидаги огоҳлантиришлари фонида қабул қилинди.

Сешанба куни Исроил ҳаво ҳужумлари оқибатида камида беш нафар фаластинлик, жумладан, икки бола ва Ҳамас қўмондони ҳалок бўлди, деб хабар берди соғлиқни сақлаш расмийлари ва Ҳамас манбалари.

Исроил ҳарбийлари Ғазо жанубида Ҳамас қўмондонини ва шимолда яна бир жангчини ўлдирганини маълум қилди. Иккала ҳодисада ҳам бир нафардан бола ҳалок бўлгани хабар қилинган.

Бундан ташқари, Буюк Британиянинг "Фаластинликларга тиббий ёрдам" хайрия ташкилоти Ғазо шимолидаги Жабалия шаҳрида ўзлари қўллаб-қувватлайдиган тиббиёт марказида Исроил дрони томонидан бир бемор ўлдирилганини маълум қилди. Исроил ҳарбийлари вакили ББCга бундай ҳодисадан хабардор эмаслигини айтди.

Ғазодаги уруш 2023 йил 7 октябрда Ҳамас бошчилигидаги Исроил жанубига қилинган ҳужум билан бошланган бўлиб, ўшанда 1200 га яқин одам ҳалок бўлган ва 251 киши гаровга олинган эди.

Ўшандан бери Ғазода 73 790 дан ортиқ одам ҳалок бўлди, деб хабар беради ҳудуддаги Ҳамас назоратидаги соғлиқни сақлаш вазирлиги. Ушбу маълумотлар БМТ томонидан ишончли деб ҳисобланади.