Андижон вилоятида ҳаво ифлосланиши сабабли корхона фаолияти вақтинча тўхтатилди
Андижон вилоятида ҳаво ифлосланиши сабабли корхона фаолияти вақтинча тўхтатилди
Андижон вилояти Балиқчи туманида аҳолининг ҳаво ифлосланишидан шикоят қилган мурожаатларидан сўнг тошни қайта ишлаш корхонаси фаолияти 10 кунга тўхтатилди. Текширув чиқиндиларнинг йўл қўйиладиган меъёрлардан ошиб кетганини, тозалаш иншоотлари ва экологик хулоса йўқлигини, шунингдек, чиқиндиларни сақлашда қоидабузарликларга йўл қўйилганини кўрсатди.
Текширув Экология ва иқлим ўзгариши миллий қўмитаси, Андижон вилояти Экология бошқармаси ва Экополиция мутахассислари томонидан ўтказилди.
Текширувчилар аниқлашича, корхонада ҳавони муҳофаза қилиш чора-тадбирлари ишлаб чиқилмаган. Бундан ташқари, тошни қайта ишлаш жараёнида ҳосил бўладиган чанг-газ чиқиндиларини тозалаш қурилмалари мавжуд бўлмаган.
Лаборатория тадқиқотлари чиқиндилар таркибидаги зарарли моддалар миқдори белгиланган меъёрлардан юқори эканлигини тасдиқлади.
Шунингдек, ишлаб чиқариш чиқиндиларини жойлаштиришда ҳам қоидабузарликлар аниқланди. Бундан ташқари, корхона давлат экологик экспертизасининг ижобий хулосасисиз фаолият юритган.
Якунда корхона фаолияти 10 кунга тўхтатилди. Раҳбариятга аниқланган қоидабузарликларни бартараф этиш, чиқиндиларни тўғри сақлаш ва олиб чиқиб кетишни таъминлаш, шунингдек, зарур экологик хулосани олиш бўйича кўрсатмалар берилди.
Бундан ташқари, корхона зиммасига атроф-муҳитга етказилган зарар учун компенсация тўлаш мажбурияти юкланди.
Аввалроқ Тошкентда экологик талабларни бузган металлургия корхоналари фаолияти тўхтатилган эди.